بەڕێوەبەری خانەنشینانی یەکەی 70: وەرگرتنی زەویی خانەنشینانی یەکەی حەفتاش دەگرێتەوە

جێگری بەڕێوەبەری گشتیی خانەنشینانی پێشمەرگەی سەر بەوەزارەتی پێشمەرگە رایگەیاند خانەنشینانی یەکەی 70 هاوشێوەی خانەنشینانی دیکە وەرگرتنی زەوی دەیانگرێتەوە.

حاکم فەتحوڵڵا عومەر، جێگری بەڕێوەبەری گشتی خانەنشینانی پێشمەرگە سەر بەوەزارەتی پێشمەرگە و بەرێوەبەری خانەنشینانی یەکەی 70 رایگەیاند بڕیارەکەی ئەنجوومەنی وەزیرانی هەرێمی کوردستان بۆ دابەشکردنی زەوی خانەنشینانی یەکەی 70 و 80ـی لێدەرنەکردووە، بەڵکو ئەوانیش دەگرێتەوە وەکو هەر خانەنشینێکی دیکە".

راشیگەیاند:"وەزارەتی پیشمەرگە نووسراوی کردووە بۆ گواستنەوەی خانەنشینانی سەر بە یەکەی 70 بۆسەر بەڕێوەبەرایەتیی گشتیی خانەنشینان سەر بەوەزارەتی دارایی، ئێمەش پرۆسەکەمان دەستپێکردووە، تاوەکو ئێستا هەشت هەزار و 508 خانەنشینیی پێشمەرگەمان رەوانەی خانەنشینیی گشتیی وەزارەتی دارایی کردووەو پرۆسەکەیان بەردەوامە."

ناوبراو ئاماژەی بۆئه‌وەشکرد:" چوار هەزار و 163 خانەنشینی کەمئەندامی سەنگەریش ماوە کە مەلەف و ناوەکانیان رەوانەی بەرێوەبەرایەتی گشتی خانەنشینی بکەن، وتیشی" رێکارەکان هەروا ئاسان نییە و کاتی دەوێت، بەڵام بەردەوامین تاوەکو هەموویان تەواو دەکەین".

ئەوەشی دووپاتکردەوە:"سەرجەم ئەو خانەنشینانەی لەیەکەی 70 دەگوازرێنەوە بۆ سەر بەرێوەبەرایەتیی گشتیی خانەنشینانی سەربە وەزارەتی دارایی، هاوشێوەی خانەنشینانی دیکە مافی وەرگرتنی زەویان هەیە."