بەرهەمهێنانی نەوتی کەرکوک زیاد دەکرێت

دوای گەشەپێدانی دوو کێڵگەی نەوتی لە پارێزگای کەرکوک، کۆمپانیای نەوتی باکوور ڕۆژانە چوار هەزار بەرمیل بەرهەمهێنانی نەوت زیاد دەکات و دەڵێت، ئەو نەوتە بۆ پڕکردنەوەی پێداویستی ناوخۆی عێراق و وەبەرهێنانی غاز بەکاردەهێنرێت.
عەقیل وەهبی، بەڕێوەبەری دەستەی کێڵگە نەوتییەکانی کەرکوک سەر بە کۆمپانیای نەوتی باکوور بە ڕۆژنامەی سەباحی نیمچە رەسمی ڕاگەیاندووە، زیادکردنی بەرهەمهێنانی نەوت بۆ پڕکردنەوەی پێداویستیی ناوخۆییە لە بەرهەمەکانی نەوت و وەبەرهێنانی غاز، ئەویش دوای گەشەپێدانی بیرە نەوتەکانی ژمارە 76 لە کێڵگەی جمبور و ژمارە 200 لە کێڵگەی نەوتی بای حەسەن کە ئێستا بە بەردەوامی کاریان تێدا دەکرێت.
راشیگەیاندووە لە هەر کام لەو دوو کێڵگە نەوتییە ڕۆژانە دوو هەزار بەرمیل نەوت زیاد دەکرێت.
ئێستا بەرهەمی ڕۆژانەی کێڵگە نەوتییەکانی کەرکوک لە دەورووبەری 300 بۆ 350 هەزار بەرمیلە، زۆرینەی ئەو نەوتەش هەناردەی دەرەوە ناکرێت و بۆ دابینکردنی وزە لە ناوخۆی عێراقدا بەکاردەهێنرێت.