مێژوو دەڵێت عێراق براوەیە

مێژوو دەڵێت عێراق براوەیە
ئاکۆ بیبانى
دوای بردنەوەى لەهەڵبژاردەى عوممان و بەدەستهێنانى یەکەمین سێ خاڵ لە پاڵاوتنەکانى کیشوەرى ئاسیا بۆ گەیشتن بە جامى جیهانى 2026 ، هەڵبژاردەى عێراق بە ئومێدێکى زۆرەوە دوەمین تاقیکردنەوەى خۆى بەرامبەر بە هەڵبژاردەى کوەیت ئەنجام دەدات .
یارى نێوان هەردوو هەڵبژاردە هەمیشە پڕە لە ململانێ و ڕکابەرى ، عێراق بەسەرکردایەتى خیسۆس کاساسى ئیسپانى هەوڵدەدات لەدەرەوەى یاریگاى خۆى بەئەنجامێکى شایستەوە رزگارى بێت ، هەرچەندە ئەیمەن حسێنى گۆڵکارى ناتوانێت بەهۆى نەشتەرگەرییەکەیەوە بەشدارى بکات بەڵام کاساس هێرشبەرى جێگرەوەى لەبەردەستدایە و دەتوانێت سەرکردایەتى هێڵى پێشەوە بکەن .
 لەبەرامبەردا هەڵبژاردەى کوەیت لە یارى یەکەمیدا هەرچەندە لەدەرەوەى یاریگاى خۆى یارى دەکرد لەگەڵ ئوردن بە گۆلێک یەکسانبوون و هەر یەکەو خاڵێکیان دەستەبەرکرد ، کوەیت بەسود وەرگرتن لە یاریگا و هاندەران هەوڵدەدات سێ خاڵى دیدارەکە لە چنگى هاوتا عێراقییەکەى دەربهێنێت ، کوەیت پێکهاتەکەى جێگیرەو هیچ پێکانێکى نیە .
خوان ئەنتۆنیۆ پیتزی ئەرجەنتینی و  ڕاهێنەری هەڵبژاردەی کوەیت ڕەتیکردەوە کارتی بردنەوەکانی لە یارییەکەی بەرامبەر هەڵبژاردەی عێراق ئاشکرا بکات.
هەردوو هەڵبژاردە لە گروپى دووەم شانبەشانى ( ئوردن و عوممان و فەلەستین و کۆریاى باشوور) یارى دەکەن .
مێژووى ڕووبەرووبونەوەکانى نێوان هەردوو هەڵبژاردە لە بەرژەوەندى شێرەکانى رافیدەینە کاتێک لە 41 یارى رابردوودا بەرەنگارى یەکتربونەتەوە ، عیراق لە 18 یاریدا تامى بردەوەى کردوە ، کوەیتیش لە 14 یاریدا براوە بووە ، عیراق 54 گۆڵى تۆمارکردوەو کوەیتیش لە 44 جاردا گەیشتۆتە سەر تۆڕى گۆڵى عیراقییەکان .
دوایین ڕووبەڕووبوونەوەی نێوان هەڵبژاردە لە یارییەکى دۆستانەبوو لە 30ی کانوونی یەکەمی 2022 بوو، کاتێک بە بردنەوەی عێراق بە ئەنجامی گۆلێکى بێ وەڵام  کۆتایی هات، گۆڵەکەش لەلایەن عەلی فایزی بەرگریکارەوە تۆمارکرا.