فەڕەنسا داوای کۆبوونەوەی بەپەلەی ئەنجوومەنی ئاسایش دەکات

حکومەتی فەڕەنسا داوای کۆبوونەوەیەکی بەپەلەی ئەنجوومەنی ئاسایشی نەتەوە یەکگرتووەکان بۆ تاوتوێکردنی دۆخی لوبنان دوای هێرشە بەردەوامەکانی ئیسرائیل بۆ سەر ناوچە سنوورییەکانی ئەو وڵاتە دەکات.
جین نۆیل بارۆت وەزیری دەرەوەی فەڕەنسا رایگەیاند، داوای کۆبوونەوەیەکی بەپەلەی ئەنجوومەنی ئاسایشی نەتەوەیەکگرتووەکانی کردووە، بۆ تاوتوێکردنی دۆخی لوبنان و رێگرتن لە فراوانبوونی زیاتری جەنگەکە لەو ناوچەیەدا.
وەزیری دەرەوەی فەڕەنسا داوای لە هەموو لایەنەکانی جەنگەکە کرد، خۆیان لە فراوانبوونی جەنگەکە بپارێزن، چونکە ئەو جەنگە کارەساتێکی مرۆیی لێدەکەوێتەوە، بەتایبەتیش دژ بە هاوڵاتییانی سیڤیلە.
ئەمە لەکاتێکدایە، لە دوو رۆژی رابردوودا، ئیسرائیل هێرشێکی ئاسمانیی بەرفراوانی کردووەتە سەر ناوچە جیاوازەکانی لوبنان، یواڤ گالانت وەزیری بەرگریی ئەو وڵاتە رایگەیاند، ئەوەی حیزبوڵا لە 20 ساڵی رابردوودا بنیادینابوو، لەناویانبرد.