وەفدێکی یەکێتی داواکاری مووچەخۆرانی گه‌یانده‌ سەرۆک وەزیران و پارێزگاری بانکی ناوەندی

وەفدێکی یەکێتیی نیشتمانیی کوردستان لەگەڵ سەرۆک وەزیرانی عیراق و پارێزگاری بانکی ناوەندی عیراق کۆبوونەوە، بەمەبەستی بەدواداچوون بۆ جێبەجێکردنی بڕیاری دادگای فیدرالی لەبارەی تەوتینی مووچەی مووچەخۆرانی هەرێم، هەروەها نوسراوی فراکسیۆنی یەکێتی و یاداشت و ئیمزای چوار فراکسیۆنی کوردستانی و (١٣٨) پەرلەمانتارو سەرۆکی فراکسیۆنی عێراقی کە پشتیوانی تەوتینن درایەسەرۆک وەزیرانی عیراق و پاریزگاری بانکی ناوەندی.

کاروان یاروەیس بڕیاردەری فراکسیۆنی یەکێتیی نیشتمانیی کوردستان لە ئەنجومەنی نوێنەرانی عیراق رایگەیاند: "وەفدێکی یەکێتیی نیشتمانیی کوردستان کە پێکهاتبوو لە د.خالد شوانی وەزیری دادی عێراق د.نەرمین مەعروف و کاروان یاروەیس پەرلەمانتارانی یەکێتی، لەگەڵ محەمەد شیاع سودانی سەرۆک وەزیرانی عێراق کوبووینەوە بەئامانجی بەدواداچوون بۆ جێبەجێکردنی بڕیاری دادگای باڵای فیدرالی لەبارەی تەوتینی مووچەی هەرێمی کوردستان".

"لەکۆبونەوەکەدا نووسراوی فراکسیۆنی یەکێتی و یاداشت و ئیمزای چوار فراکسیۆنی کوردستانی و (١٣٨) پەرلەمانتارو سەرۆکی فراکسیۆنی عیراقی پێشکەش بە سەرۆک وەزیرانی عیراق کرا کە پشتیوانی داوای مووچەخۆرانی هەرێمی کوردستان دەکەن بۆ جێبەجێکردنی بڕیاری دادگای باڵای فیدرالی بۆ تەوتین لەرێگای بانکە فیدرالیە حکومیەکانەوە، هەوەک سوپاسی پەرۆشی سەرۆک وەزیرانمان کرد بۆ چارەسەرکردنی کێشەی مووچەو کێشەکانی تری نێوان هەرێم و حکومەتی ئیتحادی"، کاروان یاروەیس وادەڵێت.

ئاماژەی بەوەشدا: "هەمان رۆژ وەفدەکە لەگەڵ عەلی عەلاق پارێزگاری بانکی ناوەندی عیراق کۆبووینەوە، بەدواداچوون بۆ جێبەجێکردنی بڕیاری دادگای فیدرالی لەبارەی تەوتینی مووچەی هەرێم تەوەری سەرەکی کۆبونەوەکە بوو".