ئەمریكا: حەماس رێگری لە ئاگربەستی غەززە دەکات

راوێژكاری ئاسایشی نەتەوەیی ئەمریكا رایگەیاند، بزوتنەوەی حەماس رێگریی رێككەوتنی راگەیاندنی ئاگربەستی غەززە دەکات.
جیك سۆلیڤان ئاماژەی بەوەكرد، ئەمریكا هەڵسەنگاندن دەكات بۆ ئەوەی بزانێت ئیسرائیل تا چی ئاستێك هەنگاوی ناوە بۆ باشكردنی رەوشی مرۆیی لە غەززە، ئەوەش لە دوای ئەوەی لە 13ـی تشرینی یەكەمدا ئیدارەكەی بایدن كۆمەڵێك هەنگاوی بۆ ئیسرائیل دیاریكرد كە پێویستە لە ماوەی 30 رۆژدا بینێت بۆ باشكردنی رەوشی مرۆیی لە غەززە.
سەبارەت بە راگەیاندنی ئاگربەستیش لە غەززە رایگەیاند، بزوتنەوەی حەماس رێگرە لەو هەنگاوە .
لای خۆیەوە، ئوسامە حەمدان سەركردە لە بزوتنەوەی حەماس رایگەیاند، ئیسرائیل بە چاوپۆشی ئەمریكا رێگریدەكات لە گەیشتن بە ئاگربەست و هەموو ئەو كۆمەڵكوژی و تاوانانەش كە ئیسرائیل لە غەززە ئەنجامی دەدات بە پشتگیری و هاوبەشی ئەمریكا و چەند وڵاتێكی ئەوروپیە، داواشیكرد باڵیۆزەكانی ئیسرائیل لە وڵاتانی عەرەبی دەربكرێن.