عیراق بۆ مووچەی مانگی 10ـی موچەخۆرانى هەرێم 250 ملیار دەبڕێت

ئەندامێكی ئەنجومەنی نوێنەرانی عیراق رایگەیاند، چارەسەرنەكردنی گرفتەكانی لیستی موچە و نەگەڕاندنەوەی داهاتی نانەوتی و تەواوبوونی بەشە بودجەی هەرێم، هۆكاری دواكەوتنی ناردنی موچەی مانگی دەی موچەخۆرانە لەلایەن بەغدادەوە.

سۆران عومەر رایگەیاند، عیراق بۆ مووچەی مانگی دەی موچەخۆران 250 ملیار دەبڕێت، روونیشیکردەوە بڕینی ئەو بڕە بەهۆی چارەسەرنەكردنی كێشەكانی لیستی موچە و هاوتاكردنی خانەنشینان و بەشە بودجەی هەرێمە كە هیچ پارەیەكی بۆ موچە نەماوە و بەپێی بڕیاری دادگای فیدرالیش بەبانكیكردنی موچە لە بەشە بودجەی هەرێم دەكرێت.

دەشڵێت، بۆ مانگی ١٠ و ١١ و ١٢، هەرێم داوادەكات لە بودجەی وەبەرهێنان موچە دابینبكرێت و داهاتی نانەوتیشی رادەستنەكردووە.

وتیشی، تــــا ئێستا گرفتی دوو موچەیی و نەبوونی ژمارەی وەزیفی فەرمانبەران و بایۆمەتری و دامەزراندنی نوێ و مامۆستایان و فەرمانبەرانی كەركوك چارەسەرنەكراون، بۆیە پێویستە هەرێم لەوە زیاتر یاری بە قوتی خەڵك نەكات و مەترسیی بۆ موچەی ئەم سێ مانگەی كۆتایی ساڵ دروستـنـەكات و لە داهاتی نەوت و ناوخۆ ئەو موچانە دابین بكات.