هەوڵی وەزارەتی کار و کاروباری کۆمەڵایەتی بۆ هاوتاکردنی مووچەی خاوەن پێداویستیی تایبەت بەردەوامە

بۆ هاوتاکردنی مووچەی خاوەن پێداویستیی تایبەتی هەرێمی کوردستان گفتوگۆ لەگەڵ بەغدا کراوە، بەڵام هێشتا بەغدا وەڵامی یەکلاییکەرەوەی نەداوەتەوە.
بریکاری وەزارەتی کار و کاروباری کۆمەڵایەتیی هەرێمی کوردستان دەڵێت، بەردەوامدەبن لە هەوڵەکانیان لەگەڵ حکومەتی عێراق بۆ هاوتاکردنی مووچەی خاوەن پێداویستییە تایبەتەکانی هەرێمی کوردستان.
بەگوێرەی ئاماری وەزارەتی کار و کاروباری کۆمەڵایەتی، ئێستا نزیکەی 76 هەزار کەس، مووچەی خاوەن پێداویستیی تایبەت وەردەگرن و مووچەکانیان مانگانە 150 هەزار دینارە ئەگەر هاوتای بەغدا بکرێت دەبێتە 250 هەزار دینار..
ئەمە لە کاتێکدایە جگە لەو خاوەن پێداویستییە تایبەتانەی مووچە وەردەگرن، لە ساڵی 2013ـەوە هیچ خاوەن پێداویستییەکی نوێ تۆمار نەکراوە بۆ ئەوەی مووچەیان پێــبدرێت. سامان حوسێن لێپرسراوی یەکێتیی کەمئەندامانی کوردستانیش رایگەیاندووە، زیاتر لە 40 هەزار خاوەن پێداویستیی تایبەت، چاوەڕێی ناوتۆمارکردنن.