ژووری بازرگانی و پیشەسازی سلێمانی چەند گرێبەستێكی لەگەڵ كۆمپانیا بەناوبانگەكانی پۆڵۆنیا ئەنجامداو سەرۆكی ژووری بازرگانیی و پیشەسازیی سلێمانی-یش دەڵێت: "نوێنەری فراكسیۆنی یەكێتی دەستپێشخەر بوو بۆ ئەنجامدانی گرێبەستەكان، كەدواجار سوودی بۆ سەرجەم هەرێمی كوردستان هەیە" هاوكات ئەندامێكی فراكسیۆنی یەكێتیش دەڵێت: "كۆمپانیا بەناوبانگەكانی پۆڵۆنیا لەهەرێم دەستبەكار دەبن".
نەوزاد غەفور، سەرۆكی ژووری بازرگانی و پیشەسازی سلێمانی، لەكۆنگرەیەكی رۆژنامەوانیدا رایگەیاند: "لەڕێگەی فراكسیۆنی یەكێتیی نیشتمانیی كوردستانەوە لە ئەنجومەنی نوێنەرانی عیراق، توانیمان ئەمڕۆ 15-1-2024، لەگەڵ چەند كۆمپانیایەكی وڵاتی پۆڵۆنیا گرێبەستی كاری پێكەوەیی و دابینكردنی پێداویستی ئیمزابكەین".
راشیگەیاند: "ئەو كۆمپانیایانەی ژووری بازرگانی و پیشەسازی سلێمانی كە گرێبەستەكەیان لەگەڵداكراوە، لەبوارەكانی بەرهەمهێنانی تراكتۆرو پێداویستی كشتوكاڵی و خۆراك و گۆشت و ئامێری سۆنەرو بەدەستهێنانی وزەی پاك كاردەكەن و سوودێكی زۆریان بۆ هەرێمی كوردستان و پارێزگای سلێمانی دەبێت، هاوكات كۆمپانیاكان خوازیارن وەبەرهێنانی گەورە لەپارێزگای سلێمانی و هەرێمی كوردستاندا بكەن".
هاوكات غەریب ئەحمەد كەوەك نوێنەری فراكسیۆنی یەكێتی، سەردانی پۆڵۆنیای كردبوو، تیشكی خستەسەر دروستكردنی پەیوەندییەكان و لەوبارەیەوە بەوێبسایتی رەسمی یەكێتیی نیشتمانیی كوردستان PUKMEDIA ی راگەیاندووه: "ئەو كۆمپانیایانەی هاتوونەتە پارێزگای سلێمانی كۆمپانیای زۆر گەورەو بەناوبانگی پۆڵۆنیان و لەداهاتوویەكی نزیكدا هەرێمی كوردستان راستەوخۆ دەتوانێت مامەڵەو وەبەرهێنانیان لەگەڵدا بكات، ئەمەش سوودی زۆری بۆ خەڵكی كوردستان دەبێت".
"لەڕێی ئەو گرێبەستانەی ژووری بازرگانی و پیشەسازی سلێمانی لەگەڵ كۆمپانیا پۆڵۆنییەكان كردوویانە، خۆراك و گۆشتی سوورو سپی و پێداویستی كشتوكاڵی، بەشێوەیەكی هەرزان دەگاتە هەرێمی كوردستان و ناچار نابین لەوڵاتانی دیكەوە هاوردەی بكەین" غەریب ئەحمەد وایوت.
پێشتر وەفدێكی ئەنجومەنی نوێنەرانی عیراق بەمەبەستی پتەوكردنی پەیوەندییەكان و برەودان بەكەرتی پیشەسازی و كشتوكاڵ سەردانی وڵاتی پۆڵۆنیایان كردبوو، نوێنەری فراكسیۆنی یەكێتیش كەئەندامی وەفدەكەبوو هەوڵی دروستكردنی پەیوەندی بازرگانی و كشتوكاڵی لەنێوان كۆمپانیاكانی ئەو وڵاتەو هەرێمی كوردستانی داو سەردانی وەفدەكەی پۆڵۆنیاش بۆ هەرێم لەوچوارچێوەیەدایە.
Copyright © 2020 Kirkuk Tv All Rights Reserved Designed And Developed By AVESTA GROUP