بەئامانجی پاکترکردنەوەی شار پارێزگاری کەرکوک چەند بڕیار و رێنماییەک دەردەکات

بەئامانجی پاکترکردنەوەی شار و زیادکردنی سەوزایی، پارێزگاری کەرکوک چەند بڕیار و رێنماییەک دەردەکات.
رێبوار تەها پارێزگاری کەرکوک، لەگەڵ ئەندازیار ئەحمەد عومەر، بەڕێوەبەری شارەوانی و بەرپرسی بەشی پرۆژەکان و خزمەتگوزاری و باخچەکان و سەرجەم کەرتەکانی شارەوانی کۆبووەوە.
لە کۆبوونەوەکەدا پارێزگار بەوردی لەسەر هەوڵەکانی شارەوانی بۆ پاکردنەوەی شار و دروستکردنی باخچە و زیادکردنی پانتایی سەوزایی گفتوگۆی کرد و چەند بڕیار و رێنمایی و راسپاردەیشی دەرکرد.
گرنگترینیان ئەوەبوو، کەرتەکانی شارەوانی راسپارد بەهاوکاری لەگەڵ رێکخراوەکانی کۆمەڵگەی مەدەنی و مامۆستایانی ئایینی لە رێگەی مزگەوتەکانەوە، دانیشتوان لە پاكراگرتنی شار و پشتیوانیکردنی تیمەکانی پاکردنەوە هۆشیار بکەنەوە.
هەروەها، خاوەن چێشتخانە و مۆڵ و مارکێتەکان ئاگاداربکرێنەوە لە پاك راگرتنی بەردەم دووکان و شوێنکارەکانیان، بە پێچەوانەوە دەدرێنە دادگا و رووبەڕووی سزای یاسایی دەکرێنەوە و شوێنەکانیان دادەخرێت.
هاوکات ⁠بەڕێوەبەرایەتی پەروەردەی کەرکوک راسپێردرا، هەڵمەتی هۆشیارکردنەوە لە خوێندنگاکان بە ئامانجی پاك راگرتنی شار سەرپێ بخات.