ئەحمەد شەرع: دەبێت چەک لەدەستی دەوڵەتدا بێت

ئەحمەد شەرع دەڵێت، شۆڕش سوریای لە ونبوون رزگارکرد، بەڵام هێشتا ئاستەنگی گەورە ماوە و دووبەرەکیش قبوڵ ناکەین.
لەمیانی پێشکەشکردنی وتارێک لە کۆنفرانسی نیشتمانی دیالۆگی سوریا، ئەحمەد شەرع سەرۆکی قۆناغی راگوزەری سوریا، رایگەیاند، سوریا دوبەرەکی قبوڵ ناکات و دەبێت چەک لەدەستی دەوڵەتدا بێت.
وتیشی: ئەمڕۆ سوریا بەتەواوەتی گەڕاوەتە دەستی گەلەکەی، قۆرخکردنی چەک لەدەستی دەوڵەت، شتێکی قورس نییە، بەڵکو ئەرکە لەپێناو فەراهەمکردنی ئاشتی بۆ هاوڵاتییانی وڵاتەکە.
سەبارەت بە فۆڕمی داهاتوی حکومەتی سوریا، شەرع وتی: نابێت سیستمێک هاوردەبکەین کە لەگەڵ دۆخی وڵاتەکەدا نەگونجێت، چونکە ناکرێت کۆمەڵگە بکرێتە شوێنێک بۆ تاقیکردنەوە و جێبەجێکردنی خەونە سیاسییەکان.

بۆ کۆنفرانسی دیالۆگی نیشتمانی 600 کەسایەتی سوریا بانگهێشتکرابون کە 570 کەسیان بەشدارییان کردوە، چاوەڕوان دەکرێت ڕاسپاردەکان سەبارەت بە قۆناغی داهاتوی وڵاتەکە پەسەند بکرێت و ڕێژەی ئامادەبونی کۆنفرانس گەیشتووەتە 97% و 570 بانگهێشتکراو بەشداری دانیشتنەکانیان کردووە، لەکاتێکدا تەنها 30 کەس داوای لێبوردنیان کردووە بەهۆی بەشدارینەکردنیان.
بەشداربوان بەسەر شەش لیژنەی تایبەتمەندا دابەشدەکرێن، دیارترینیان دروستکردنی دامەزراوەکان، ئامادەکردنی ڕەشنووسی دەستوور، دادپەروەری ڕاگوزەر، ئازادییە گشتیەکان و ئابوورییە.