غیدون ساعر وه‌زیری ده‌ره‌وه‌ی ئیسرائیل رایگه‌یاند، سه‌قامگیریی سوریا ته‌نها به دامه‌زراندنی سیستمێكی فیدراڵی به‌دێت كه سه‌رجه‌م ناوچه جیاوازه‌كان مافی ئیداره‌ی سه‌ربه‌خۆیان هه‌بێت و رێز له شێوازی ژیانی فره‌یی له وڵاته‌كه‌دا بگیرێت.
وه‌زیری ده‌ره‌وه‌ی ئیسرائیل له وته‌یه‌یه‌كیدا كه له میانی كۆبونه‌وه‌ی ئه‌نجومه‌نی هاوبه‌شیی ئه‌وروپاو ئیسرائیل له برۆكسیل پێشكه‌شیكرد، (باسكردن له گواستنه‌وه‌ی ده‌سه‌ڵات) له سوریای به(پووچ و بێ مانا) ناوبرد، هه‌روه‌ك حكومه‌تی نوێی له سوریا به چه‌ند گروپێكی تیرۆرستی جیهادی ئیدلب ناوهێنا، كه ده‌سه‌ڵاتیان له رێگه‌ی به‌كارهێنانی (هێز) گرتووه‌ته‌ده‌ست.
باسی له‌وه‌شكرد كه:" حكومه‌تی كاتیی له سوریا تۆڵه له عه‌له‌وییه‌كان ده‌كاته‌وه‌و ئازاری كوردش ده‌دات"
جه‌ختشیكرده‌وه كه :"ئیسرائیل هه‌رگیز سازش له‌سه‌ر ئاسایشی خۆی له‌سه‌ر سنووری سوریا ناكات"
لێدوانه‌كه‌ی ساعیر له‌كاتێكدایه دوورۆژ له‌مه‌وبه‌ر بنیامین نه‌تانیاهۆ، سه‌رۆك وه‌زیرانی ئیسرائیل، داوایكرد كه ناوچه‌كانی باشووری سوریا بكرێت به ناوچه‌ی له‌چه‌ك له‌داماڵڕاو و رێگه‌ش نه‌درێت (هه‌یئه‌ی ته‌حریر شام) یان سوپای نوێی سوریا بوونیان له ناوچه‌كانی باشووری دیمه‌شق هه‌بێت.
Copyright © 2020 Kirkuk Tv All Rights Reserved Designed And Developed By AVESTA GROUP