راگەیەندراوی مەكتەبی سیاسی بۆ ساڵیادی تاوانی كیمیایبارانی هەڵەبجە

مەكتەبی سیاسی ی.ن.ک بۆ ساڵیادی تاوانی كیمیایبارانی هەڵەبجە، راگەیەندراوێکی بڵاوکردەوە و تێیدا هاتوە، بە خەمێكی قوڵەوە یادی ۳۷ ساڵەی  تاوانی دڕندانەی   دژ  بە گەلەكەمان  دەكەینەوە  كە لەشاری  هەڵەبجە لە لایەن هێزەكانی  رژێمی  بەعسی  روخاوەوە  بەرامبەر  بە خەڵكی بێدیفاع  و مەدەنی ئەو شارە  ئەنجامدرا.

ئەو تاوانەی شۆڤێنیەكانی  بەعس  رقێك بوو  بەرامبەر رۆڵی مێژوویی هەڵەبجە كە لە جوڵانەوەی  فەرهەنگی  و شارستانێتی  و سیاسیدا  خاوەنی  بیری  دەوڵەمەند و پێشكەوتنخوازی  كوردایەتی بوون  و لە راپەرین و شۆرشەكانی  گەلەكەشماندا  هەمیشە سەرمەشق  بوون، بە تایبەتی لە  شۆرشی  نوێی گەلەكەماندا .

ئاماژەی بۆئەوەشکردوە، لە پاش راپەڕینەوە یەكێتیی لەسەر ئەركی خۆی و دواتر لە رێگەی حكومەتی هەرێمەوە هەوڵی بێوچانی خستەگەڕ بۆ گەڕاندنەوەی سیمای  ئاوەدانی و پێشكەشكردنی خزمەتگوزاری بە هەڵەبجەو خەڵكەكەی.

مەکتەبی سیاسی ی.ن.ک راشیگەیاندوە، سەركردایەتی یەكێتی لە رێگەی فراكسیۆنەكەیەوە لە پەرلەمانی عیراق و تیمی ئیدارەی هەڵەبجەو حكومەتی فیدراڵی، لە هەوڵی  بەردەوامدان   تاوەكو  لە  ئەنجومەنی   نوێنەران پرۆژە یاسای  بەرەسمی  ناساندنی  هەڵەبجە  وەك نۆزدەیەمین پارێزگای عێراق دوا خوێندنەوەو دەنگدانی لەسەر بکرێت  و بە پێی  یاسا و بنەما دەستورییەكان  گشت  شایستە و مافەكانی   بۆ دابین بكرێت.