فه‌رماندی پێشووی (باكور)و سه‌رۆكی ئۆپراسیۆنه‌كانی (مۆساد) له به‌یروت رایده‌گه‌یه‌نێت، ده‌بێت ئیسرائیل ئاماده‌كاریی بكات بۆ روبه‌ڕووبونه‌وه له‌گه‌ڵ سوپای توركیا.
یائیر رافید رافیتز فه‌رمانده‌ی پێشووی ئۆپراسیۆنه‌كانی ناوچه‌ی باكور له (یه‌كه‌ی 504)و سه‌رۆكی لقی ئۆپراسیۆنه‌كانی (مۆساد) له به‌یروتی پایته‌خی لوبنان، رایده‌گه‌یاند:" ده‌بێت ئیسرائیل ئاماده‌كاریی بكات بۆ روبه‌ڕووبونه‌وه له‌گه‌ڵ سوپای توركیا."
رافیتز له وتارێكیدا كه له رۆژنامه‌ی(یه‌دیعوت ئه‌حره‌نۆت) بڵاویكردووه‌ته‌وه نووسیووییه‌تی:" دووژمنی دووه‌م دوای (ئه‌حمه‌د شه‌رع) سه‌رۆكی سوریا، توركیایه، به سه‌رۆكایه‌تی ره‌جه‌ب ته‌یب ئه‌ردۆغان، كه هه‌وڵده‌دات خۆی جێگیر بکات و جێگەی خۆی لە سوریا بكاته‌وه."
ئاماژه‌ی بۆئه‌وه‌شكردووه كه:" ئه‌ردۆغان ئامانجگه‌لی جۆراوجۆی هه‌یه، كه ئیسرائیل یه‌كێك له‌و ئامانجانه‌یه، به‌ڵام له سەرووی لیستی ئەولەویەتەکانیدا نیه، به‌ڵام له داهاتوودا ئیسرائیل ده‌خاته نێو پلانه‌كانی"
باسی له‌وه‌شكردووه كه :" ئه‌ردۆغان له داهاتوودا هێزه‌كانی له باشووری سوریا، بۆ هه‌ڕه‌شه‌كردن له ئیسرائیل ئاماده‌ده‌كات، له‌م قۆناغه‌دا ده‌بێت خۆئاماده‌كردنی ئیسرائیل پشت به هه‌واڵگریی ببه‌ستێت، به‌ڵام ده‌بێت ئه‌ندامانی شیاو پێشتر هێزێكیان به راستیی پێكهێنابێت، كه كاتیشی هات، ده‌بێت هاوكات ئاماده‌ی روبه‌ڕوبونه‌وه بێت له‌گه‌ڵ سوپای توركیا، كه به گه‌وره‌ترین سوپا له جیهاندا ئه‌ژمارده‌كرێت"
رافیتز ده‌شڵێت:" ماوه‌یه‌كی زۆره وه‌همی ئاشتیی و ئارامیی تێكشكاوه، كه سه‌رۆك ئه‌ركانه‌كانی ئیسرائیلی هاندا، هێزی سوپای ئیسرائیل له جه‌نگی (شمشێره ئاسنینه‌كان) و روبه‌ڕوبوونه‌وه له‌گه‌ڵ (حزب الله) له باكور كه‌مبكه‌نه‌وه."
جه‌ختشیده‌كاته‌وه :" ئه‌ندامبوونی توركیا له هاوپه‌یمانیی ناتۆ گرنگه، هه‌ڵوێستی ئه‌مریكاش كاریگه‌ری زۆری هه‌یه، به‌ڵام دونیایه‌كی پارێزراو بوونی نییه، سیاسه‌تش له ئه‌مریكاو له‌گه‌ڵیدا سیاسه‌تی ئیداره‌كه‌ی به‌رامبه‌ر به ئیسرائیل و ناوچه‌كه ده‌گۆڕێت"
Copyright © 2020 Kirkuk Tv All Rights Reserved Designed And Developed By AVESTA GROUP