تیرشتیگن سیناریۆى کۆرتوا دووبارە دەکاتەوە !

 تیرشتیگن سیناریۆى کۆرتوا دووبارە دەکاتەوە !
ئاکۆ بیبانى
مارک ئەندرێ تیرشتیگنى ئەڵمانى و گۆڵپارێزى یانەى بارسێلۆناى ئیسپانى ، پێشکەوتنى گەورە لە تەندروستى و جەستەیی ڕویداوەو بە پێى ئەو گۆڕانکارییە خێراییانە بێت کە گۆلپارێزەکە پێیدا تێپەڕدەبێت ، چاوەڕوان دەکرێت لە چەند هەفتەى داهاتوو دەستکێشەکانى بکاتەوە دەستى و لە نێو هێڵى گۆڵى یانە کەتەلۆنیەکە بوەستێت و دووبارە وەک دیوارى پۆڵاین پارێزگارى لەهێڵى گۆڵەکەى بکات .
تیرشتیگنى تەمەن 32 ساڵان لە یارى نێوان بارسێلۆنا و فیاڕیاڵ کە بەئەنجامێکى گەورە بەسودى یانە کەتەلۆنیەکە کۆتایی هات دوچاری پێکانێکى قورس و سەخت هات و یانەکەى  زیانێکى گەورەى بەرکەوت  کاتێک گۆڵپارێزەکەى لەدەستدا و راستەوخۆ گواسترایەوە بۆ نەخۆشخانە و چەند نەشتەرگەرییەکى بۆ ئەنجامدرا و هەر ئەو کات ئەوە ئاشکراکرا کە ئەم وەرزە بۆ گۆڵپارێزە ئەڵمانیەکە کۆتایی هاتوە .
لە ئێستادا شتیگین زۆر بەباشى دەردەکەوێت و چارەسەرەکان وەردەگرێت و چاوەڕوان دەکرێت ، لەناوەڕاستى مانگى چوار بەتەواوى لەپێکانەکەى چاک بێتەوە .
ئێستا تیرشتیگن خەون بەوەوە دەبینێت هەمان سیناریۆى تیبۆا کۆرتواى بەلجیکى و گۆڵپارێزى یانەى ریاڵ مەدرید دووبارە بکاتەوە، کاتێک پار ساڵ لەسەرەتاى وەرز دووچارى پێکان هات و دواتر لە یارى کۆتایی چامپیۆنزلیگ گەڕایەوەو هاوبەشى یانەکەى کرد لە بردنەوەى نازناوەکە .
شتیگن دەیەوێت بەهەمان رێگاى کۆرتوادا بڕوات ، گەر بارسا گەیشت بە قۆناغەکانى کۆتایی ئەوا بگەڕێتەوەو نازناوەکە بباتەوە .
ئەوەى کێشەیە ، لە دوای پێکانەکەى شتیگین ، ناوى چیزنى پۆڵەندى زیادکراو ناوى گۆڵپارێزە ئەڵمانیەکە سڕایەوە ، بە پێى یاساکانى یۆفاش کاتێک ناوێک دەسڕێتەوە ناتوانرێت دووبارە زیاد بکرێتەوە مەگەر لەیەک حاڵەتدا نەبێت ، ئەویش لادانى ناوى ئەو کەسەیە کەزیادکراوە .
ئەمەش کارێکی قورسە، بە لەبەرچاوگرتنی ئەوەی کە چیزنى لە یارییەکاندا بەهای خۆی لە پاراستنی گۆڵی تیپەکەدا سەلماندووە و متمانەی هاندەرانی کەتەلۆنی بەدەستهێناوەو ئاستى ناوازەى پێشکەش کردوە .