دیمەشق و درووزەکان بۆ راگرتنی شەڕ و پێکدادان گەیشتنە رێککەوتن

بەرپرسانی دیمەشق و ریش سپیی درووزەکان بۆ راگرتنی شەڕ و ئاڵۆزییەکانی جەرمانا و سەحنایا گەیشتن بەڕێکەوتن، هێزی ئەمنیی دیمەشق بۆ کۆنترۆڵکردنی دۆخەکە لەو ناوچانە بڵاوەیان پێکراوە.
ئاژانسی رەسمیی سوریا سانا بڵاویکردەوە، شەوی رابردوو پارێزگارەکانی ریفی دیمەشق و سوەیدا و قونەیتیرە و ژمارەیەک لە ریشسپی و کەسایەتیی درووزەکان لەبارەی رووداوەکانی جەرەمانە و سەحنایە گەیشتن بە رێککەوتنی سەرەتایی بۆ راگرتنی گرژییەکان.
دوای رێککەوتنەکەش پارێزگارەکان بۆ دڵنیابوون لە سەقامگیری دۆخی ئەمنی سەردانی سەحنایەیان کردووەو  هێزی ئەمنی دیمەشقیش چونەتە تەواوی ناوچەکانی سەحنایا و دەوروبەری، هەروەها جەختیان لەوەکردووەتەوە دەبێت چەک تەنها بەدەست دەوڵەتەوە بێت.
لەلایەکی دیکەوە، سوپای ئیسرائیل هۆشداری بە سوپای سوریاداوە و وتوویەتی: لە ئەگەری بەردەوامی توندوتیژیەکان دژی دروزەکان هێرشدەکەینە سەر ئامانجەکانی حکومەتی سوریا.
بەگوێرەی ئامارەکانی روانگەی سوری، تەنها لەماوەی 48 سەعاتی شەڕ و پێکدادانەکانی نێوان هێزەکانی دیمەشق و دروزەکاندا لە هەردوودا 47 کەس کوژراون.