لەمەودوا هێرشی ناڕەوا بۆ سەر یەكێتی بە شێوەی خۆی وەڵام دەدرێتەوە

ستران عەبدوڵڵا ئەندامی مەکتەبی سیاسیی ی.ن.ک لە دیدارێکیدا لەگەڵ کەناڵی ئاسمانیی کەرکوک، رۆشنایی خستەسەر ئەو هێرشانەی لەلایەن هەندێک کەس و لایەنەوە دەکرێنە سەر یەکێتی و روونیکردەوە کە وەک لە راگەیەنراوی دوایین كۆبوونەوەی ئەنجومەنی سەركردایەتیدا بڕیاری لێدراوە، یەکێتی وەڵامی هەموو ئەو هێرش و چەواشەکارییانە دەداتەوە کە دەکرێتە سەر مێژووی خەبات و قوربانیدانی، لەرێی بەڵگەنامە و دیكۆمێنتی پشتڕاستكراوەوە داكۆكی لەو مێژووە دەکات و بۆ ئەوەش لیژنەی پێکهێناوە و لیژنەکەش دەستبەکاربووە. ئەمەی خوارەوەش پوختەی دیدارەکەیە:
دیداری / فارس نەوزاد
سەرەتا ئاماژەی بەوە دا: ئەو چەواشەكارییانەی کە دەكرێنە سەر مێژووی پڕ سەروەریی یەكێتی، نابێت بێ وەڵام بمێننەوە جا لەژێر هەر پاساوێكدا بێت، ئەمەش بۆ یەكێتی و بۆ هەر حزبێكە كە بیر لە ئایندە بكاتەوە، یەكێتیش لەو حزبانەیە كە بیر لە ئایندەی نەتەوەكەی و بیر لە بزووتنەوەی سیاسیی كوردستان دەكاتەوە و رووی لە ئایندەیە.
رابردووی ی.ن.ک رابردوویەكی پڕ سەروەری و شانازییە كە شەهید و قوربانی داوە و سەركردەی گەورەی وەك مام جەلال و تێكۆشان و نەبەردیی گەورەی هەیە، بۆیە كاتێك هێرش دەكرێتەسەر یەكێتی و قسەی لەسەر دەكرێت بەشێوەی جۆراو جۆر، خۆ دەبێت یەكێتیش قسەی خۆی هەبێت.
هەروەها دەڵێت: یەكێتی قوربانی زۆری بۆ ئازادیی كوردستان داوە و خوێنی زۆری بەخشیووە بەو ئازادییەی كوردستان، بۆیە هەقی خۆیەتی ئەویش سوود لەو ئازادییەی كوردستان وەربگرێت و هیچ نەبێت بۆ بەرپەرچدانەوەی ئەو هێرشانەی كە دەكرێتەسەری، وەك لە 40 بۆ 50 ساڵی خەباتی رابردوویدا دەردەكەوێت، هێرش بۆ سەر یەكێتی، هێرشە بۆ سەر هەموو بزووتنەوەی سیاسیی كوردستان و هەموو گەلی كوردستان كە ئەم خەباتە لەپێناوی ئەواندا كراوە. بۆیە كۆبوونەوەی ئەنجومەنی سەركردایەتی ئەم بابەتەی بە گرنگ زانی و وەک لە بەلاغی كۆتاییدا هاتووە ئەركی ئەنجومەنی سەركردایەتی و لیژنەی تایبەتییە كە بەرپەرچی ئەم هێرشانە بداتەوە.

هۆكارەكانی شێواندنی 
مێژووی یەكێتی
هەروەها وتی: هۆكار زۆرە بۆ ئەم شێواندنە و هۆكاریش زۆرە كە ی.ن.ک بە ئامانجگیراوە لەم هێرشانەدا. جارێك لەبەرئەوەی كە شۆڕشی كوردستان، یەكێتیی نیشتمانیی كوردستان كردوێتی، پاشان دوا زنجیرە قوربانی یەكێتی بەخشیویەتی، دواتر خەباتی یەكێتی پانوپۆڕە و باڵی كێشاوە بەسەر عیراق و هەر چوار پارچەی كوردستاندا، لە ناوچەكەشدا یەكێتی هێزێكی موعتەبەرە كە زنجیرە سەرۆك كۆمارێكی پێشكەشی ئەم وڵاتە كردووە، ناو و ناوبانگی هی ئەوەیە كە لە دنیادا جێی شانازیی میللەتی كورد بێت، لەبەرئەوە هەندێک لە هێزە نوێکان كە دروست دەبن، ئەگەر بیانەوێت جێگایەك بۆ خۆیان بكەنەوە لەناو پڕۆسەی سیاسیدا و لەناو ئەم ئازادییەی كوردستاندا، ئەوا یەكێتی پشكی شێری بەردەكەوێت لە قوربانیدان بۆ ئەم ئازادییە، بۆیە زۆرجار یەکێتی دەکەنە ئامانج، بەڵام یەکێتیش دەتوانێت سوود لەو ئازادییە ببینێت کە خۆی هێزی سەرەکی بەدیهێنانی بووە و ئازادانە بەرگریی لەخۆی بکات.
لێپرسراوی مەکتەبی راگەیاندن روونیشیکردەوە کە هەموو دیاردەیەكی سیاسی نوێ لەگەڵ خۆیدا دیاردەی خراپیش دەهێنێت، كە هەندێك هێز پەیدا دەبن، شتێكی نوێیان پێ نییە بۆ ئایندەی میللەتەكەمان، بۆیە پەلاماری ئەو مێژووەی یەكێتی دەدەن و وا دەزانن بە راماڵینی مێژوو و ناوبانگی یەكێتی و بژارەکردن لە رووداوێك لێرە و لەوێ دەتوانن ئەو مێژووە بشێوێنن، بۆئەوەی جێگە بۆ خۆیان بكەنەوە. 
هەروەها وتی: زۆر سەیرە یەكێتی بەو رابردووە پڕ لەسەروەرییەوە چاوی لە ئایندەیە، بەڵام رەوتێک هەیە ئێستا دروستبووە نەک تەنها حزبێک کە هەوڵ دەدەن ئەم مێژووە پرشنگدارەی یەكێتی بشێوێنن، لەكاتێكدا دیاریش نییە ئەوانە بەدیلیان چییە، لەكاتێكدا پەلاماری ئەم تەلارە بەرزەی كوردایەتی و دیموكراسی دەدەن، ئەی نابێت بەدیلیان هەبێت؟ بەڵام 20 ساڵی رابردووش سەلماندوێتی كە یەكێتی بەدیلی نییە لەم خەباتەدا.

خەڵكی دیكە دەبێت
 لە بەڵگەكانی یەكێتی بترسێت
لەبارەی توانای یەكێتییەوە بۆ وەڵامدانەوەی ئەو هێرشە ناڕەوایانەی دەكرێنە سەری،  وتی: زۆرجار لە پەنا هەر نیازێکی دیكەدا بۆ هێرشكردنە سەر یەكێتی، نەیارانی دەرەكیی یەكێتیش خۆیان دەشارنەوە، جاران دەمانتوانی ئەوانە دیاری بكەین كە كێ جاسووسی داگیركەرە، بەڵام ئێستا بەهۆی پێشكەوتنی تۆڕە كۆمەڵایەتییەكانەوە، لەراستیدا زۆرجار نازانین و رەنگە دەزگاكانی لێكۆڵینەوە ئەوە بزانن، بەڵام ئیدی كاتێتی یەكێتی وەڵام بداتەوە و دەستەوەستان نەوەستێت، چونکە  یەكێتی نە كادری كەمە و نە بەڵگەکانی بەردەستیشی كەمن و نە مێژووە پڕ شانازییەكەشی كەمە، بۆیە دەبێت خەڵكی دیكە لە خۆی بترسێت ئەگەر یەكێتی راستییەكان باس بکات و هەڵسەنگاندن بۆ بارودۆخی رابردوو بکات، ئەم مێژووە دوور و درێژەی سەرۆك مام جەلال و خوێنی شەهیدەكانی یەكێتی لە سەرتاسەری كوردستاندا نەخشاندوویانە، هی ئەوە نییە كە گاڵتەی پێبكرێت و یەكێتییەکان لێی بێدەنگ بن.

دەرس و دەور 
لە مەدرەسەکەی مام جەلال-دا
ستران عەبدوڵڵا هەروەها رایگەیاند؛ زۆرجار لە مێژوودا شۆڕش و رەنج و خەباتی خەڵكی دیكە دزراوە، بەڵام مەدرەسەی مام جەلال وایە كە لە هەندێك شوێندا بێدەنگی هەڵبژێردرێت، لەوبارەیەشەوە وتی: تەنانەت لە 31ی ئابدا ئەوەش روویداوە كە یەكێتی بۆ پاراستنی كوردستان و خۆشگوزەرانیی هاووڵاتیان و بەردەوامیی خەباتەكەمان خۆی لێ بێدەنگ كردووە، نابێت خەڵكی وا تێبگەن كە یەكێتی تیكەیەكە ئاسان دەخورێت، چونکە مانەوەی ی.ن.ک بۆ هەموو كوردستان و بۆ هەموو هێزە سیاسییەكان پێویستە، تەنانەت بۆ ئەو هێزانەش پێویستە کە لە داهاتوودا دروست دەبن.
هەروەها سەرسوڕمانی خۆی لەوەش نیشاندا کە خەڵكی دیكە چۆن لە روویان دێت و چۆن دەتوانن خەبات بكەن و ئازایەتی ئەوە پەیدا دەكەن، ئەگەر ئەنجامەكەیان وەك یەكێتی نەبێت، پەلاماری یەكێتی بدەن؟ یەكێتی دەتوانێت كتێب بە كتێب، وتار بە وتار، دیكۆمێنتاری بە دیكۆمێنتاری وەڵام بداتەوە، پاشان یەكێتی جنێوفرۆش نییە ئەگەرنا سۆشیال میدیاش بە سۆشیال میدیا وەڵام دەداتەوە.
وتیشی: هەركەس پێیوایە بە پەلاماردانی یەكێتی، مێژوو و شوێنی خۆی لە بزووتنەوەی رزگاریخوازیی كورد لە عیراق و دیموكراسیی عیراقدا بەهێز دەكات، كەسیان ناگەن بە دامێنی خەباتی مام جەلال، لە خەبات و تێكۆشاندا، كەسیان ناگەن بە شەهیدەكانی یەكێتی، ئەوان زۆریان دەوێت و دەبێت بخوێننەوە، پێش هەموو شتێك دەبێت لە مەدرەسەی یەكێتی دا بخوێننەوە تا بزانن خەبات و نیشتمانپەروەریی و كوردایەتی چییە؟ دەبێت بچن دەورو دەرسی مێژووی یەكێتی بكەنەوە تا شتێك فێربن بۆئەوەی بۆ ئایندەیان بەكەڵك بێت. هەش بەسەر ئەو كەسانەی پەلاماری مێژووی یەكێتی دەدەن، دەبێت بزانن ئەوە پەلاماری مێژووی كوردستان و میللەتەكەمان دەدەن.
تۆ ئەگەر پەلاماری مێژووی میللەتێك دەدەیت، ئیدی چی پێشبینییەکت هەیە كە سبەینێ دەبیت بە گەورەی ئەو میللەتە؟ یاخود دەبیت بە كەسێك بۆ ژیانی ئەم میللەتە پێویست بیت؟

یەكێتی كتێب بە كتێب 
وەڵام دەداتەوە
لەبارەی ئەو كتێبانەوە كە لەسەر مێژووی یەكێتی نووسراون و  دەنووسرێن، لێپرسراوی مەكتەبی راگەیاندن ئاماژە بەوە دا کە یەكێتی وەڵامی هەموو ئەو كتێبانە دەداتەوە كە لەسەر مێژووی یەكێتی نووسراون، مادام خەڵكی بە كتێب لەسەر یەكێتی دەنووسێت، ئێمەش بە كتێب وەڵام دەدەینەوە و یەكێتی دەستەوەستان نابێت و قسەی خۆشی دەكات لەسەر ئەو مێژووە، هەر كتێبێك كە لە هەلومەرجی ئازادی كوردستاندا لە دایك دەبێت، یەكێتیش بە هەقی خۆی دەزانێت ئەو هەلومەرجە بەكار بهێنێت، چونكە خوێنی پێبەخشیووە و خەباتی بۆ كردووە و وەڵامی دەدەینەوە. 
وتیشی: سەرۆك بافڵ-یش لە هەمان مەدرەسەی مام جەلالە و بڕوای بەوەیە كە كتێب بە كتێب وەڵام بدرێتەوە و لە كۆبوونەوەی ئەنجومەنی سەركردایەتیی یەكێتیدا وتی: ئەركمانە بەرگریی لە مێژووی یەكێتی بكەین، مادام بە كتێب لەسەرمان نووسراوە، بەكتێب وەڵام دەدەینەوە.
لە كۆتایی دیدارەكەشدا، لێپرسراوی مەکتەبی راگەیاندن: ئاماژەی بەوە دا کە زۆرێک لە خەڵكی كوردستان پەرۆشی ئەوەن كە بەڵگەكان رادەستی یەكێتی بكەن و مێژووی خۆی بەراستی بنووسێتەوە، رەنگە ئەمە دەرفەتێكیش بێت كە یەكێتی مێژووی رەسمیی خۆی بە قۆناغبەندییەكی جوان بنووسێتەوە، كە ئەمەش تەنها مێژووی یەكێتی نابێت، بەڵكو مێژووی دێهاتەكانی كوردستان و ئەو كەسانەش دەبێت کە بە نان و نمەكی خۆیان و شەونخونی خۆیان و باربۆی خۆیان، ئەم شۆڕشەیان گەورەكرد و پەروەردەكرد. 
وتیشی: ئێستا لیژنەكانی نووسینەوەی مێژووی یەكێتی دەستی بەكارەكانی خۆی كردووە و زۆر كەسیش هەن كە بەڵگەیان لەلایە و ئامادەن شاهیدی بۆ هەق بدەن، لەكاتی پێویستدا پەیوەندییان پێوە دەكرێت.
جەختیشی لەوە کردەوە کە زۆر سوپا لەبەردەم ئیرادەی یەكێتیدا تێكشكاوە، پێموایە سوپای پەلاماری سۆشیال میدیا و میلیشیای لابەلای كتێبۆكە و ئەوانەش لەبەردەم تۆماری گەورەی راستییەكانی یەكێتیدا بەچۆكدا دێن و كۆتاییان پێدێت.


داڕشتنەوەی بۆ کوردستانی نوێ: 

ئازاد ئیبراهیم