رۆژنامه‌نووس ئومێد بەرۆشکی: هۆكاری گرتنه‌كه‌م ره‌نگه‌ بۆ رێگریكردن بێت له‌ كردنه‌وه‌ی ماڵپه‌رێكی هه‌واڵی

دوای دەستگیرکردنی لە لایەن ئاسایشی دهۆکەوە بۆ نزیکەی دوو کاتژمێر، ڕۆژنامەنووس ئومێد بەرۆشکی بە دەنگی ئەمەریکای ڕاگەیاندوه‌، دەست بەسەر چەند کەلوپەلێکیدا گیروە و دەڵێت شیانی هەیە هۆکاری دەستگیرکردنەکەی فشار بێت بە ئامانجی ڕێگریکردن لە هەوڵەکانی بۆ کردنەوەی ماڵپەڕێکی هەواڵی.

ئومێد بەرۆشکی بە دەنگی ئەمەریکای وتوه‌:" لەم چەند ڕۆژەی دواییدا سەرقاڵی دووبارە کردنەوەی ماڵپەڕێکی هەواڵی بووە و ڕایگەیاند، "هۆکاری دەستگیرکردنەکەی دیار نییە، چونکە هیچی نەگوتووە و نە لێکۆڵینەوەشی لەگەڵدا کراوە...هیچ تۆمەتێک نییە بەڵام دەشێت بەهۆی (ڕاست میدیا) وە بێت."

(ڕاست میدیا) ماڵپەڕێکی هەواڵی بوو بۆ گواستنەوەی هەواڵ لە دهۆک و ناوچەی بادینان کە ئومێد بەرۆشکی خاوەن ئیمتیازەکەی بوو و خاوەنی نزیکەی 10 کارمەند بوو بەڵام نزیکەی 6 مانگ لەمەوبەر داخرا.

ئومێد بەرۆشکی بە دەنگی ئەمەریکای وتووه‌: "هەرچەندە ئێمە مۆڵەتی کارکردنمان هەبوو لە لایەن سەندیکای ڕۆژنامەنووسانی کوردستان بەڵام ئێمە خۆمان دامانخست چونکە [ئاسایشی گشتی هەولێر] پێیان وتین، 'ئەگەر وەکو ئێمە کاردەکەن کاربکەن گەرنا ڕێگەتان نادەین.' بۆیەش ئێمە بۆ دروستنەبوونی کێشە خۆمان دامانخست."

ڕۆژنامەنووسەکەی دهۆک ئاماژه‌ی بۆئه‌وه‌شكردووه‌:" کاتژمێر 2ی پاشنیوەڕۆی ڕۆژی دووشەممە بەکاتی هەولێر لەگەڵ ڕۆژنامەنووسێکی تری هاوڕێی بەناوی یاسر ئەبدولڕەحمان بۆ ماوەی نزیکەی کاتژمێر و نیوێک لە ئاسایشی دهۆک "دەستگیرکران" و دوای ئازادکردنیان کەلوپەلەکانیان بۆ نەگەڕێندرایەوە."

ئومێد بەرۆشکی ڕاشیگەیاندووه‌: "ئاسایش هەندێک سوکایەتی کرد...ئێمەیان لە ژورێک دانا کە لەناو ئاسایش بوو."

هەروەها ده‌ڵێت: "ئازادکردنەکەمان بە کەفالەت نەبوو. ئێمەیان بردە ئەوێ بەبێ لێکۆڵینەوە و دواتر گوتیان، 'بڕۆنەوە چونکە هیچ شتێک نەبووە.' هیچ بەڵێننامەیەکیان پێ پڕنەکردینەوە تەنها شتەکانی ئێمەیان لا مایەوە کە بریتیبوون لە 3 کۆمپیوتەر و لاپتۆپێک و کامێرایەک."

لای خۆیەوە ڕەمەزان ئەرتەشی پارێزەری ڕۆژنامەنووس ئومێد بەرۆشکی هێزەکانی ئاسایشی بەوە تۆمەتبار کردووه‌ کە دەستگیرکردنەکەیان پێشێلکاریی یاسا بووە.

ڕەمەزان ئەرتەشی بە دەنگی ئەمەریکای ڕاگەیاندوه‌:"وا دیارە، ئەمڕۆ بەم شێوەیە چونەتە ماڵی کاک ئومێد بەرۆشکی ڕۆژنامەوان و دەستیانگرتووە بەسەر کەلوپەلە ڕۆژنامەوانیەکانی. دەبوایە بڕیاری دادگای بۆ دەرچووبایە و موختاری گەڕەکی لێ ئاگادارکرابایەوە و بەم شێوەیە چوبانە ماڵەکەی. ئاسا بەگشتی بە هیچ شێوەیەک ڕێگەنادات بەم شێوەیە کەسێک دەستگیر بکرێت."