ئه‌مریكا.. ژماره‌ی قوربانیانی ئاگره‌كه‌ی هاوای نزیك ده‌بێته‌وه‌ له‌ 90 كه‌س

پێنج رۆژ له‌مه‌وبه‌ر له‌ دورگه‌ی ماوی سه‌ر به‌ دورگه‌ی هاوای ئاگر كه‌وته‌وه‌، تا ئێستا نزیكه‌ی 90 كه‌س گیانیان له‌ده‌ستداوه‌ و چاوه‌ڕێ ده‌كرێت ژماره‌كه‌ رو له‌ به‌رزبونه‌وه‌ بكات.

حاكمی ویلایه‌تی هاوای ئه‌مه‌ریكا رایگه‌یاند؛ به‌هۆی ئه‌و ئاگره‌ی له‌ دورگه‌كه‌ كه‌وتوه‌ته‌وه‌ تائێستا به‌شێكی زۆری دارستانه‌كانی سوتاندوه‌ و 89 كه‌سیش گیانیان له‌ده‌ستداوه‌.

ئاماژه‌ی بۆ ئه‌وه‌شكردوه‌ كه‌ چاوه‌ڕێ ده‌كرێت ژماره‌ی قوربانیان رو له‌ به‌رزبونه‌وه‌ی زیاتر بكات و ده‌بێت خه‌ڵك بۆ ئه‌و شته‌ ئاماده‌ بن.

له‌ رۆژی سێشه‌ممه‌وه‌ ئاگرێك له‌ دورگه‌ی ماوی سه‌ر به‌ دورگه‌ی هاوای كه‌وته‌وه‌، ئاگره‌كه‌ به‌هۆی شێو باوه‌ ته‌شه‌نه‌ی سه‌ندوه‌و به‌پێی وته‌ی بنكه‌ی پۆلیسی ماوی له‌ ئێستادا تیمه‌كان (كه‌ی ناین) به‌ به‌كارهێنانی سه‌گی راهێنراو توانیویانه‌ 3%ـی ناوچه‌ زیانلێكه‌وتوه‌كان بگه‌ڕێن هه‌ربۆیه‌ چاوه‌ڕێ ده‌كرێت ژماره‌ی قوربانیان زیاتر ببن.

ئه‌م ئاگره‌ به‌ گه‌وره‌ترین كاره‌ساتی سوتان له‌ مێژوی 100 ساڵی رابردوی ئه‌مه‌ریكا داده‌نرێت.