قوباد تاڵەبانی لەگەڵ وەفدێکی باڵای سەربازی بەریتانیا کۆبووەوە

قوباد تاڵەبانی جێگری سەرۆک وەزیران پێشوازی کرد لە وەفدێکی باڵای سەربازی بەریتانیا بە سەرۆکایەتی مارشاڵ سامی سامپسۆن، گەورە راوێژکاری بەرگریی بەریتانیا لە رۆژهەڵاتی ناوەڕاست و باکوری ئەفریقا و لە کۆبوونەوەی نێوانیاندا چەند پرسی جێگەی بایەخی هەردوولا تاوتوێ کران.

لە تەوەرێکی کۆبوونەوەکەدا کە رۆژی چوارشەمە، ٢٢ی نۆڤەمبەری ٢٠٢٣ لە هەولێر بەڕێوەچوو و کونسوڵی گشتیی بەریتانیاش بە وەکالەت ئامادەی بوو، باسی دۆخی ناوخۆی هەرێم و پرۆسەی ریفۆرم لە وەزارەتی پێشمەرگە کرا. جێگری سەرۆک وەزیران رایگەیاند لێکتێگەیشتنی باش دروست بووە بۆ چارەسەرکردنی کێشەکان و کۆبوونەوەکانی ئەم دوایەی نێوان هەردوو لایەنی یەکێتیی نیشتمانی کوردستان و پارتی دیموکراتی کوردستان ئەرێنی بوون. 

ئاماژەی بەوەشدا هەنگاوەکان بە ئاراستەی چارەسەرکردنی کێشەکانی ناو وەزارەتی پێشمەرگەن و گەشبینین بەم نزیکانە بە تەواوی کێشەکانی وەزارت بە هاوکاری و پشتیوانی هەموو لایەک چارەسەر بکرێن و ئەمەش رەوتی چاکسازییەکان لە هێزەکانی پێشمەرگە خێراتر دەکات. 
لەمبارەیەوە وەفدی باڵای سەربازی بەریتانیا پشتگیری خۆیان بۆ هەرێمی کوردستان و بە تایبەتیش بۆ بەردەوامیی چاکسازییەکانی وەزارەتی پێشمەرگە دووپات کردەوە.
لە بەشێکی دیکەی کۆبوونەوەکەدا باسی دۆخی ئەمنی ناوچەکە و عێراق و هەرێمی کوردستان کرا. هەردوولا جەختیان کردەوە کە پێویستە حکومەت و لایەنە عێراقییەکان هەوڵەکانیان چڕبکەنەوە بۆ رێگریکردن لە هەرچەشنە هەنگاو و جوڵەیەک کە ببێتە هۆی بارگرژی و ناسەقامگیری لە عێراقدا. هەردوولاش هاوڕابوون کە مانەوەی هێزەکانی هاوپەیمانان لە عێراق و هەرێمی کوردستان گرنگە بۆ پاراستنی ئاسایش و سەقامگیری عێراق.