د.لەتیف جەمال رەشید سەرۆك کۆماری عیراق لەکۆشکی سەلام لەبەغدا پێشوازیکرد لەعەلی رەزا گونای باڵیۆزی تورکیا لەعێراق.
لەمیانی دیدارەکەدا جەختکرایەوە لەسەر پەرەپێدانی پەیوەندییە دووقۆڵییەکان و بەهێزکردنی هاریکاری و هاوئاهەنگی نێوان هەردوو وڵات، بەشێوەیەك کەخزمەت بە بەرژەوەندی هاوبەشی هەردوو گەلی دۆست بکات.
لەدیدارەکەدا سەرۆك کۆمار جەختیکردەوە لەسەر گرنگی بەهێزکردنی پەیوەندییەکان و هاریکاری نێوان بەغداو ئەنقەرەو کاری هاوبەش لەسەر هەردوو ئاستی نێودەوڵەتی و هەرێمیی بۆ چەسپاندنی ئاسایش و سەقامگیری و ئاشتی لەناوچەکەدا.
سەرۆك کۆمار ئاماژەی بەوەشکرد، عێراق دەخوازێت پەیوەندی نایابـــی لەگەڵ تورکیای دراوسێی هەبێت لەئاستە جیاجیاکاندا، هەروەها بەپەرۆشە بۆ بونیاتنانی پەیوەندی لەگەڵ وڵاتانی بــــــــراو دۆست لەسەر بنەمای رێزگرتن لەسەروەری و دەستوەرنەدان لەکاروباری ناوخۆ.
لای خۆشیەوە باڵیۆزی تورکیا خواستی وڵاتەکەی بۆ چەسپاندنی هاریکاری و هاوئاهەنگی دووپاتکردەوە لەپێناو هێنانەکایەی لێکتێگەیشتنی هاوبەش سەبارەت بەبابەتەکانی نێوان هەردوو وڵات و پرسە ئیقلیمییەکان، هەروەها ئامادەکارییەکانی سەردانی سەرۆکی تورکیای بۆ عێراق خستەڕوو.
Copyright © 2020 Kirkuk Tv All Rights Reserved Designed And Developed By AVESTA GROUP