بەرەی مقاوەمەی ئیسلامی: تا دوای تەواوبوونی چلەی ئیمام حسێن هێرشەکانمان رادەگرین

بەشێک لەگروپە چه‌كداره‌كانی ‌عێراق کە خۆیان بەبەرەی مقاوەمەی ئیسلامی ناساندوە ڕایدەگەیەنن، بەهۆی بەڕێوەچونی ڕێوڕەسمەکانی یادکردنەوەی چلەی ئیمام حسێنەوە، هێرشەکانیان بۆسەر بنکە سەربازییەکانی ئەمریکا لەعێراق بەشێوەیەکی كاتی ‌ڕادەگرن.
باڵی ئەسحابولکەهف کە پێشتر بەرپرسیارێتیی خۆی لەچەند هێرشێک بۆسەر بنکە سەربازییەکانی ئەمریکا لەعێراق ‌و سوریا ڕاگەیاندبوو، لەبڵاوکراوەیەکدا ڕاگرتنی هێرش ‌و پەلاماردانی بنکە سەربازییەکانی ئەمریکای لەعێراق‌ و سوریا بۆ ماوەیەکی کاتیی ڕاگەیاند و ده‌ڵێت: لەمڕۆ هێرشەکانیان بۆسەر ئیسرائیل ‌و بنکە سەربازییەکانی ئەمریکا لەعێراق ‌و سوریا تاوەکو دوای تەواوبونی ڕێوڕەسمی یادی چلەی ئیمام حسێن ڕادەگرن".
هەروەها هەڕەشە دەکەن، لەدوای تەواوبونی ڕێوڕەسمەکانی چلەی ئیمام حسێن، هێرشەکانیان بۆسەر خاکی ئیسرائیل‌ و بنکەکانی ئەمریکا لەسوریا و وڵاتانی کەنداو دەستپێدەکەنەوە.