وه‌زاره‌تی ده‌ره‌وه‌: ئەو هاووڵاتییانەی لە ئێرانن ئاگاداری خۆتان بن

وه‌زاره‌تی ده‌ره‌وه‌ی عێراق داوا له‌و عیراقییانە ده‌كات كه‌ له‌ ئێرانن، ئاگاداری خۆیان بن و له‌و شوێنانه‌ دووربن كه‌ ئیسرائیل دەیانکاتە ئامانج.
وه‌زاره‌تی ده‌ره‌وه‌ی عێراق له‌ ڕاگه‌یه‌نراوێكدا داوا لەو‌ هاووڵاتییانە دەکات کە لە ئێرانن، تائه‌وپه‌ڕی ئاگاداری خۆیان بن و له‌و شوێن و ناوچانه‌ی ئه‌گه‌ری هه‌یه‌ ئیسرائیل‌ هێرشی بکاتە سەر دوور بكه‌نه‌وه‌.
وه‌زاره‌تی ده‌ره‌وه‌ی عێراق داواشی له‌ هاووڵاتییان كردووه‌، چاودێریی ئەو ڕێنماییانە بکەن كه‌ لایه‌نه‌ ڕەسمییەکان دەریدەکەن و له‌ بەردەوامیش له‌گه‌ڵ باڵیۆزخانه‌ی عێراق له‌ تاران و كونسوڵخانه‌كانی عێراق له‌ شاره‌كانی دیكە لە پەیوەندیدابن.
ئەم ڕاگەیەندراوەی وەزارەتی دەرەوەی عیراق لە کاتێکدایە، هەزاران هاوڵاتی عیراقی بۆ مەبەستی بازرگانی، خوێندن یاخود گەشت و پزیشکیی لە شارە جیاوازەکانی ئێرانن و لە سەرەتای شەڕی ئیسرائیل و ئێرانەوە، زۆرینەیان گەڕاونەتەوە، بەڵام هەندێکیان بە هەر هۆکارێک بێت هێشتا لە ئێران ماونەتەوە.