عیماد ئەحمەد: رێرەوی حوکم راستدەکەینەوە بەپشتوانى خەڵک

عیماد ئەحمەد ئەندامی مەکتەبی سیاسی یەکێتی رایدەگەیەنێت:"  ئەم دۆخە وادەخوازێت هەموولایەنەکان دانبەخۆدابگرن و بۆ چارەسەرکردنی کێشەکان پەنا بۆ رێگاچارەی ئاشتی ببرێت چونکە هیچ گرفتێک بە  شەڕو ئاڵۆزی چارەسەر ناکرێت". 

وتیشی :" یەکێتی  لەنێوان کێشمەکێش و ململانێیەکان بژاردەی دیالۆک و پێکەوەیی و پاراستنی ئارامی سیاسی هەڵدەبژێرێت و درێژە بە سیاسەتی حەکیمانەی سەرۆک مام جەلال دەدەین و هەموو هەوڵێکیشمان روو لە سەقامگیری سیاسییە و ئەم رووداوانەی  لە ناوچەکەشدا  روودەدەن سەرکۆنەی دەکەین و پەیامەکەی هەڤاڵ سەرۆکی یەکێتی  لەوبارەیەوە روون و راشکاو بوو ".

ئەم وتانەی عیماد ئەحمەد لەمیانی بەشداریکردنی پرسەی سەید حەسەن نسروڵا دابوو کە لەگەڵ دکتۆر خەسرەو گوڵ نوێنەری سەرۆکی یەکێتی بۆ مەکتەبی سیاسی و ئەنجوومەنە باڵاکانی یەکێتی کە سەردانی کونسوڵخانەی کۆماری ئیسلامی ئێران لە سلێمانی کرد. و  بە ناوی  یەکێتییەوە  پرسەو سەرەخۆشی خۆیان لە نزیکەوە گەیاندە کونسوڵخانەی ئێران .

عیماد ئەحمەد لەبەرامبەر پرسیاری هەڵبژاردن و راستکردنەوەی حکومڕانی بەراگەیاندنکارانی وت:" کۆتایی بە تاکڕەویی دەهێنین و خەڵک لە زاخۆوە تا خانەقین لەم حکومەتە ناڕازییە بۆیە ئێمە لەگەڵ خواستی خەڵکی خۆمان و پێویستییەکانیان هەنگاو دەنێین" 

" دەمانەوێت حکومڕانیەکی  دادپەروەر لەهەرێم بنیادبنێین کە لە خزمەتی خەڵک و بەرژەوەندی گشتییدابێت" عیماد ئەحمەد وایوت.