ریاڵ مەدرید بۆچى واز لە ئارنۆڵد ناهێنێت ؟

ریاڵ مەدرید بۆچى واز لە ئارنۆڵد ناهێنێت ؟
ئاکۆ بیبانى
ئەلیکساندەر ئارۆنۆڵدى ئینگلیزى و بەرگریکارى یانەى لیفەرپول لە چوارچێوەى پلانەکانى ریاڵ مەدریدى ئیسپانیە و رادارى ئەو یانەیەش لەسەر تواناکانى ئەو بەرگریکارە لاناچێت ، دەمێکە ئیدارەى یانەى ریاڵ مەدرید بە دوای تواناکانى ئارنۆڵدەوەن بەڵام هیچ کاتێک وەک ئێستا جدى نەبوون لە پەلکێشکردنى ئەو بەرگریکارە .
 پێکانەکەى کارفاخاڵ و دوورکەوتنەوەى بۆ ساڵێک وای لە یانەى ریاڵ مەدرید کرد ، خێراتر ، دەستکراوەتر ، زیرەکانەتر ، ئۆفەرى گواستنەوەى یاریزانەکە بخاتە سەرمێزى گفتوگۆ چونکە بۆندەکەى لەم وەرزە کۆتایی دێت ، ریاڵ دەیەوێت سوود لەو بڕگەیە وەربگرێت و بە شێوەى ئازاد بیگوازێتەوە بیکات بەجێگرەوەى کارفاخاڵى کاپتن و سەرکردە .
 ئارنۆڵد لەم وەرزەدا لە حەوت یارى لەگەڵ یانەکەى دەرکەوتوەو دوو گۆڵیشى تۆمارکردوە ، ئەوەى وایکردوە ئیدارەى یانەى ریاڵ مەدرید هێندە تامەزۆرۆى تواناکانى بن ئەو سیفاتە هێرشبەرییە کە یاریزانەکە دەتوانێت بەرگرى بکات و بەخێرایش بەرەو ناوچەى سزاى دژ بڕوات و هاوکارى پلانى هێرشبەرى بکات .
چەند مانگێکە کارگێڕی و ستافی ڕاهێنەرایەتی یانەی ڕیاڵ مەدرید هەڵسەنگاندن بۆ پێویستی بەهێزکردنی پێگەی بەرگریکاری باڵى ڕاست دەکەن سەرەڕای ئەو متمانەیەی کە بە دانی کارڤاخال و لوکاس ڤاسکێز دراوە! دوو یاریزان کە بەردی بناغەی تیپەکە بوون، یانەکە دان بە پێویستی دەستپێکردنی پلاندانان بۆ یەک لە دوای یەکدا دەنێت بۆ ئەوەی پتەویی بەرگری درێژخایەن مسۆگەر بکات،  هەردوو یاریزانەکە یاریزانی دێرین و جەنگاوەرن ساڵانێک ئەزموونیان هەیە و چەندین شەڕیان لە پێناو قەڵاى بێرنابیۆ  ئەنجامداوە!  ڕۆڵێکی گرنگیان گێڕاوە، بەڵام پێکانەکەی ئەم دواییەی کارڤاخاڵ دۆخەکەی ئاڵۆزترکردوە، زەنگی ئاگادارکردنەوەی لە ڤاڵدێبێباس لێداوە.
یانەی ڕیال مەدرید بە وردی چاودێری گەشەسەندنی ئەلێکساندەر ئارنۆڵد دەکات، بەتایبەتی بەهۆی هەمەلایەنەیی و توانای هێرشبەرییەوە! لە ڤاڵدێبیباس جەخت لەسەر کوالیتی تەکنیکی و دیدگا و توانای یاریکردنی لە چەندین شوێندا دەکەنەوە، ئەمەش وای لێدەکات نەک تەنها وەک فۆڵباک بەڵکو وەک یاریزانێکی ناوەڕاست یان ناوەوەش سەرمایەیەکی بەنرخی هەبێت،  سەرەڕای ئەوەش پەیوەندییە نایابەکەی لەگەڵ جود بێلینگهامی هاوڕێی لە هەڵبژاردەی ئینگلتەرا، دەتوانێت ئاسانکاری بکات بۆ رازیکردنى تاکو لە یانەکە یارى بکات .
.

تا ئێستا یانەی ڕیال مەدرید هەنگاوی کۆنکرێتی بۆ گواستنەوەی ئەلێکساندەر ئارنۆڵد نەناوە، بە پەیڕەوکردنی تاکتیکێکی هاوشێوەی ئەو تاکتیکەی کە لەگەڵ ئەلفۆنسۆ دەیڤز بەکارهاتووە، یانەکە هیوادارە یاریزانەکە لەگەڵ لیڤەرپوول گرێبەستەکەى نوێ نەکاتەوە، ئەمەش ڕێگەی پێدەدات پێشنیاری ئۆفەرێک بکات لە چوارچێوەی مووچەی یانەکەدا، ئەگەر هاتنی ئەو یاریزانە بەدیهات، ئەوا گواستنەوەی لە مانگی شەش دەرفەتێکی دارایی دەبێت، چونکە بە گواستنەوەی بێبەرامبەر دەگاتە تواناکانى ئەو یاریزانە 26 ساڵانە.