ئەیلوولی ئەمساڵ عیراق زۆرترین زیندانی لە سێدارە داوە

دەسەڵاتدارانی عێراق لە ماوەی مانگی ئەیلوولی ئەمساڵ لانیکەم 50 لە کەسیان لە سێدارە داوە. روانگەی “ئافاد”یش دەڵێت، لە ساڵی 2003ەوە ئەمە بە زۆرترین رێژەی لە سێدارەدارن لە مانگێکدا دادەنرێت و سەرۆکایەتی کۆماری عێراقیش بە بەرپرسیاری خێراکردن و زۆربوونی ژمارەی لەسێدارەدان دەزانێت.

روانگەی ئافاد بۆ مافەکانی مرۆڤ لە بەیاننامەیەکدا، رایگەیاندووە، دەسەڵاتدارانی عێراق لەم مانگەدا زۆرترین کەسیان لە سێدارە داوە و  لە ساڵی 2003-ەوە هاوشێوەی نەبووە. بەو پێیەی لانیکەم 50 دەستگیرکراویان لە ماوەی مانگی ئەیلوولی ئەمساڵ لە سێدارە داوە و  تەرمەکانیان رادەستی بنەماڵەکانیان کراونەتەوە.

روانگەکە بەدواداچوونی کردووە و دەرکەوتووە، ئیدارەی زیندانی ناسرییە لە مانگی ئەیلوولی ئەمساڵدا، چوار جار لەسێدارەدانی بە کۆمەڵی کردووە، گەورەترینیان لە 24ی مانگدا بووە، کە سزای سێدارە بۆ 21 دەستگیرکرا و لە بەیانییەکی زوودا جێبەجێ کراوە.

بە قسەی ئافاد، ئیدارەی زیندانەکە بە “بەبێ ئەوەی رێگەیان پێبدات نوێژ بکەن یان وەسیەتنامە و نامە بۆ بنەماڵەکانیان بنووسن”، لە ناکاو بۆ یەکەیەکی تایبەتی گواستوونەتەوە و  لەسەر سەکۆی لە سێدارە پڕۆسەکە جێبەجێ کراوە، بەجۆرێک هەرجارێک شەش دەستبەسەرکراو لە سێدارە دراون.