ئیسرائیل هێرشەکانی بۆسەر لوبنان چڕکردۆتەوە

ئەمڕۆ فڕۆکە جەنگییەکانی ئیسرائیل دوو هێرشییان کردەسەر ناوچەیەک لە باشوری بەیروت، هاوکات سوپای ئیسرائیل هۆشداریش دەداتە دانیشتوانی چەند ناوچەیەک لە بەیروت بە زوترین کات شوێنەکانیان چۆڵ بکەن، ئەمەش وەک ئاماژەیەک بۆ ئامادەکاری ئەنجامدانی هێرش بۆسەر ئەو ناوچانەی نزیکن لە دامەزراوەکانی حیزبوڵا.

لەماوەی 24 سەعاتی رابردو، ئەمە پێنجەمین هۆشداری ئیسرائیلە بۆ دانیشتوانی بەیروت بۆئەوەی باڵەخانە و شوێنەکانی نیشتەجێبون چۆڵ بکەن.

ئەفیخای ئەدرعی وتەبێژی سوپای ئیسرائیل لە تۆڕی کۆمەڵایەتی (X) بڵاویکردوەتەوە و بە لوبنانییەکان دەڵێت: ئێوە لە نزیک دامەزراوە و بەرژەوەندییەکانی حیزبوڵادان، سوپای ئیسرائیل لە نزیکترین کاتدا هێرشدەکاتە سەری، پێویستە بە زوترین کات دوربکەونەوە.

بەهۆی هێرشەکانی ئیسرائیل بۆسەر لوبنان لە 23ـی ئەیلول تا ئێستا، سێ هەزار و 365 کەس کوژراون  و  هەزار و 344 کەسیش برینداربون، کە ژمارەیەکی زۆریان ژن و منداڵن، هاوکات نزیکەی هەزار و 400 کەس ئاوارە بونو ماڵ و حاڵی خۆیان بەجێهێشتوە.