شێخ جەعفەر شێخ مستەفا پێشوازی لە باڵیۆزی ژاپۆن لە عێراق کرد

ئەمڕۆ هەینی ٢٠٢٤/١١/١٥ شێخ جەعفەر شێخ مستەفا، جێگری سەرۆکی ‏هەرێمی کوردستان، پێشوازی لە فوتۆشی ماتسومۆتۆ، باڵیۆزی ژاپۆن لە عێراق کرد، کە بەمەبەستی ماڵئاوایی و تەواوبوونی ئەرکەکەی سەردانی بەڕێز ‏جێگری سەرۆکی هەرێمی کردبوو.
‏
لە دیدارەکەدا، جێگری سەرۆک ئەرک و ماندووبوونەکانی بەڕێز فوتۆشی ماتسومۆتۆ، باڵیۆزی ژاپۆنی لە عێراق لە ماوەی ڕابردوودا بەرز ‏نرخاند، هەروەها سوپاسی بەڕێزیانی کرد و هیوای سەرکەوتنی لە ئەرکی داهاتوودا بۆ خواست.

لای خۆیەوە فوتۆشی ماتسومۆتۆ، سوپاسی پاڵپشتی و هەماهەنگیی دەزگا پەیوەندیدارەكانی هەرێمی كوردستانی كرد، هەروەها جەختی لە پەرەپێدان و بەردەوامبوونی پەیوەندییە دیپلۆماسیی و مرۆییەکانی ووڵاتەکەی لەگەڵ هەرێمی کوردستان کردەوە.
سەرکەوتن و ئەنجامەکانی هەڵبژاردنی پەرلەمانی کوردستان لە پرۆسەیەکی دیوکراسیانە و کەشێکی ئارامدا، هەروەها گرنگیی پێکهێنانی کابینەی نوێی حکومەتی هەرێمی کوردستان لە کاتێکی نزیکدا، تەوەرێکی دیکەی گفتوگۆکان بوو.