بلینکن بۆ ئیسرائیل: ئێستا کاتی کۆتاییهاتنی جەنگە

ئەنتۆنی بلینکن وەزیری دەرەوەی ئەمریکا لە کۆبوونەوەی لەگەڵ بەرپرسانی ئیسرائیل رایگەیاند، ئێستا کاتی کۆتاییهاتنی جەنگە.

بلینکن، دوێنێ بە سەردانێک بۆ جاری 11 یەم گەیشتە رۆژهەڵاتی ناوەڕاست و لە سەرەتای گەشتەکەشیدا لەگەڵ بەرپرسانی ئیسرائیل کۆبووەوە.

وەزیری دەرەوەی ئەمریکا رایگەیاند، لەبارەی گەیشتنی هاوکارییە مرۆییەکان بۆ کەرتی غەززە بەرەوپێشچوونی باش روویداوە، بەڵام هێشتا ئەوە تەواوەتی نییە.

ئاشکراشیکرد، ئێستا کاتی کۆتاییهاتنی جەنگ هاتووە، کاتێکیش ئیسرائیل بیەوێت وەڵامی هێرشەکانی ئێران بداتەوە، نابێت بە جۆرێک بێت کاریگەری لەسەر فراوانبوونی جەنگەکە هەبێت.

لە ئێستادا حکومەتی ئەمریکا دەیەوێت پێش هەڵبژاردنی سەرۆکایەتیی وڵاتەکەی کۆتایی بە هێرشی ئیسرائیل بۆ سەر کەرتی غەززە بهێنێت، بەڵام تا ئێستا هیچ ئەنجامێکی یەکلاکەرەوەی بەدەستنەهێناوە.