وەزارەتی بازرگانیی هەرێم: شایستەی دارایی جووتیاران مسۆگەرکراوە

وەزارەتی بازرگانی و پیشەسازیی حکومەتی هەرێمی کوردستان، دڵنیایی دەداتە جووتیاران، بەغداد شایستە داراییەکانیانی مسۆگەر کردووە و نافەوتێت.
شەمسەدین محەمەد، جێگری بەڕێوەبەری گشتی بازرگانی لەوەزارەتی بازرگانی و پیشەسازیی حکومەتی هەرێمی کوردستان رایگەیاند، "ئەو جووتیارانەی هەرێمی کوردستان، کە ئەمساڵ گەنمیان رادەستی سایلۆکان کردووە، رەزامەندیی لەسەر کۆی خەرجییەکانیان دراوە"، بەڵام هێشتا حکومەتی عێراق 282 ملیار دیناری جووتیاران قەرزدارە.
وتیشی، بە تەواوبوونی ساڵی دارایی 2024 کە رۆژی 15ـی کانوونی یەکەمە، گرفت بۆ رەوانەکردنی شایستەی دارایی جووتیاران دروست نابێت و بەغداد بە چەند گوژمەیەک سەرجەم ئەو شایستە داراییەی جووتیارانی هەرێمی کوردستان رەوانە دەکات.
ئەوەشی دووپاتکردەوە، هاوئاهەنگی بەردەوام لەنێوان هەردوو وەزارەتی بازرگانیی هەرێمی کوردستان و عێراق هەیە، بۆ رەوانەکردنی ئەو بڕە شایستە داراییەی جووتیاران، کە هێشتا لای بەغداد ماوە.
ئەمە لەکاتێکدایە، حکومەتی عێراق، 685 هەزار و 974 تۆن گەنمی لە جووتیارانی هەرێمی کوردستان بۆ ئەمساڵ وەرگرتووە، بەڵام هێشتا 282 ملیار دینار قەرزداری شایستەی گەنمی 2024ـی جووتیارانی هەرێمی کوردستانە.