پەرلەمانی عیراق پشتیوانی خۆی بۆ سەرژمێری گشتی رادەگەیەنێت

دەستەی سەرۆکایەتی پەرلەمانی عێراق بڕیاریدا، دوای تەواوبونی پڕۆسەی سەرژمێری دانیشتوان، هەفتەی داهاتوو دانیشتنەکانی دەستپێبکاتەوە، هەروەها داواش لە پەرلەمانتاران دەكات، "هانی هاوڵاتیان بدەن بۆ ئەوەی لە ناوچەکانیان هاوکاری تیمە مەیدانییەکانی حكومەت بکەن لە بەڕێوەچونی پرۆسەکە".
سەرۆکایەتی پەرلەمانی عێراق، لە ڕاگەیەندراوێكدا بڵاویكردەوە، پشتیوانی لە بەڕێوەچونی پرۆسەی سەرژمێریی دانیشتوان لە سەرتاسەری وڵاتەکەدا دەکات و ئاماژەی بەوەشكردوە، سەرۆکایەتی پەرلەمان داوا لە پەرلەمانتاران دەکات كە هانی هاوڵاتییان بدەن بۆ ئەوەی هاوکاری تیمە مەیدانییەکانی وەزارەتی پلاندانان بن، بۆ بەجێگەیاندنی ئەرکەکانیان بە ئامانجی سەرخستنی پرۆسەکە، كە ڕۆژانی 20 و 21ی ئەم مانگە بەڕێوەدەچێت.
دوای كۆتایهاتنی پرۆسەی سەرژمێری گشتی دانیشتوانیش لە عێراق، هەفتەی داهاتوو پەرلەمان کۆ دەبێتەوە و دانیشتنەكانی دەستپێدەكاتەوە.
ئەمەش لەكاتێكدایە بڕیارە پرۆسەی سەرژمێریی دانیشتوان لە ڕۆژانی 20 و 21ی ئەم مانگە لە سەرجەم پارێزگاكانی عێراق بە هەرێمی کوردستانیشەوە بەڕێوەبچێت، هەروەها لە ڕۆژانی بەڕێوەچونی پرۆسەکە قەدەغەی هاتوچۆ دەبێت لە سەرتاسەری وڵاتەکە.