دەستەی دادوەری وەڵامی تانەکانی هەڵبژاردن رەوانەی کۆمسیۆن دەکات و وابڕیارە هەفتەی داهاتوو ئەنجامی پەسەندکراوی هەڵبژاردن رەوانەی سەرۆکایەتی هەرێم بکرێت.
سەرچاوەیەک لە کۆمسیۆنی باڵای سەربەخۆی هەڵبژاردن رایگەیاندووە: "دەستەی دادوەری وەڵامی تانەکانی لەسەر هەڵبژاردن رەوانەی کۆمسیۆن دەکات کەوەڵامی هەر 41 تانەکە دراوەتەوە".
سەرچاوەکە دەڵێت :"هه‌فته‌ی داهاتوو ئەنجامی کۆتایی هەڵبژاردن پەسەند دەکرێت و رەوانەی سەرۆکایەتی هەرێم دەکرێت"
بەپێی یاسای کۆمسیۆنی باڵای سەربەخۆی هەڵبژاردنەکان، “داواکاری تانەدان لە ئەنجامی کۆتایی هەڵبژاردنەکان دەخرێتە بەردەم فەرمانگەکانی هەڵبژاردن لە پارێزگاکانی هەرێمی کوردستان یان دیوانی کۆمسیۆن، فەرمانگەی نیشتمانی، یان ڕاستەوخۆ ئاراستەی دەزگای دادوەری دەکرێت.
لایەنە سیاسییەکان یان کاندیدەکان مافی ئەوەیان هەیە لە ماوەی سێ ڕۆژدا لە دوای بڵاوبوونەوەی ئەنجامەکانەوە تانە لە بڕیارەکەی ئەنجومەنی کۆمسیاران بدەن و ئەنجومەنیش بەزووترین کات وەڵامی تانەکانیان دەداتەوە.
رۆژی 30ـی 10ـی 2024 کۆمسیۆن ئەنجامی کۆتایی هەڵبژاردنی خولی شەشەمی پەرلەمانی کوردستانی بڵاوکردەوە، دواتریش لەماوەی سێ رۆژدا 41 تانە لەسەر ئەنجامەکان تۆمارکرا.
رۆژی 20ـی 10ـی 2024 هەڵبژاردنی خولی شەشەمی پەرلەمانی کوردستان لە بازنەکانی هەولێر، سلێمانی، دهۆک و هەڵەبجە بەڕێوەچوو، تێیدا یەکێتیی نیشتمانیی کوردستان توانی 409 هەزار و 548 دەنگی بەدەستهێنا و 23 کورسی پەرلەمانی مسۆگەر کرد.
Copyright © 2020 Kirkuk Tv All Rights Reserved Designed And Developed By AVESTA GROUP