کریستیانۆ چیتر ماوە بیکات ؟

کریستیانۆ چیتر ماوە بیکات ؟
ئاکۆ بیبانى

كريستيانۆ رۆناڵدۆى پرتوگالى و هێرشبەرى یانەى نەسرى سعودى بەتەمەنى 39 ساڵى هێشتا بەردەوامە لە دووبارە کردنەوەى ئەو گۆڵە نایابانەى کە لەهەڕەتى لاوێتیدا تۆمارى دەکرد ، دۆن نەخەوتوەو بە یادى شانازییەکانى رابردووەوە ناژێت بەڵکو ئەوەى کردویەتى دووبارەى دەکاتەوە ، ئەوەی نەیتوانیوە بیکات ئێستا پێى دەگات !
کریستیانۆ رۆناڵدۆ گۆڵکارى مێژووى گۆی زەوى لەگەڵ هەڵبژاردەکان ، ژمارەى پێوانەیی تۆماردەکات و خودى خۆى ژمارەکە دەشکێنێت ، لە یارى نێوان پورتوگال و پۆڵەندا ، دۆن سەرکردایەتى ووڵاتەکەى کرد و بە پێنج گۆڵ بەرامبەر بە گۆڵێک سەرکەوتنیان نوسییەوە ، لەو یارییەدا موشەکەکەى مادێرا ، دوو گۆڵى تۆمارکرد، گۆڵى یەکەم بە لێدانى پیناڵتى بوو ، گۆڵى دووەمیش بە شێوازى ناوازەو سەرنج راکێش بوو ، دووبارە کردنەوەى دەبڵ کیکەکەى ریاڵ مەدرید بوو کە لە یۆفانتۆس تۆمارى کرد ، هەر ئەوەنەش نا بەو دوو گۆڵە کریس ژمارە پێوانەییەکەى خۆى شکاند کە گۆڵکارى یارییە نێودەوڵەتییەکان بوو بە تۆمارکردنى 133 گۆڵ ، لەو یارییەدا ژمارەکەى بەرز کردەوە بۆ 135 گۆڵ .
بەدەر لەوەش کریستیانۆ ژمارەیەکى دیکەى پێوانەیی تۆمارکرد و پێش سێرجیۆ رامۆسى هاوڕێى کەوت کە لە رابردوودا لەگەڵ ماتادۆرەکان لە 131 یاریدا تامى بردنەوەى کردبوو ، ئێستا کریس خاوەنى 133 بردنەوەی نێودەوڵەتییە لەگەڵ هەڵبژاردەى پورتوگال .
ئەفسانە پورتوگالییەکە هەر چەندە لە ئێستادا لە ریزەکانى یانەى نەسرى سعودى یارى دەکات ، بەڵام بەردەوامە لە دەرەوشانەوەو یارى لەدوایی یاریش ئاستى بەرزتر پێشکەىش دەکات ، ئەمەش وای لێکردوە بیر لە وازهێنانى یەکجارى نەکاتەوە ، لە ئێستادا کریستیانۆ رۆناڵدۆ خاوەنى 910 گۆڵە ، میدیاکان باس لەوە دەکەن ، رۆناڵدۆ خەون بەوەوە دەبینێت ژمارەى گۆڵەکانى بگەیەنێت بە 1000 گۆڵ ئەوکات واز لە تۆپى پێ پێ بهێنێت بەڵام دوای دوو گۆڵەکە قسەى کردوەو دەلێت بەهیچ جۆرێک گرنگى بەوە نادەم گۆڵەکانم بگەیەنم بە 1000 گۆڵ من تەنها سەرنجم لاى سەرکەوتنەکانە .