پارێزگای کەرکوک: ئەو هاووڵاتییانه‌ی خوازیارن پارێزگار ببینن داواکاری پێشکەشبکەن

راگەیاندنی دیوانی پارێزگای كەركوك بڵاویكردەوە، رێبوار تەها پارێزگاری کەرکوک رۆژانی سێشەممە هاوڵاتییانی شارەكە دەبینێت و لەنزیکەوە گوێبیستی داواكاری و كێشە و گرفتەکانیان دەبێت .

پارێزگای كەركوك لە راگەیاندراوێكدا ئاماژەی بۆئەوەكردووە:" ئەو هاووڵاتییانه‌ی خوازیارن چاویانبکەوێت بە پارێزگاری کەرکوک داواکارییەک پێشکەشبکەن کە وردەکاری داواکارییەکەو ژمارەی مۆبایلی تێدا بێت، بۆ ئەوەی هەموو سێشەممەیەک لە سەعات ٩ی بەیانی تا دوانزەی نیوەڕۆ چاوپێکەوتن لەگەڵ پارێزگار ئەنجام بدەن."

ئەوەشخراوەتەڕوو:" ئیدارەی پارێزگای کەرکوک دووپاتیدەکاتەوە کە دەرگایان واڵایە بۆ وەرگرتنی داواکاری هاوڵاتییان و گرنگیدان بە کێشەکانیان."

رێبوار تەها پارێزگاری کەرکوک، رۆژانی سێشەممەی بۆ چاوپێکەوتنی هاوڵاتییان تەرخانکردووەو رۆژی سێشەممەی رابردووش چاویکەوت بە زیاتر لە هەزار و ٦٠٠ هاوڵاتی .