دەستەی دادوەری سەرجەم تانەکانی لەبارەی هەڵبژاردنی پەرلەمانی کوردستان رەتکردەوە

وتەبێژی کۆمیسیۆنی باڵای سەربەخۆی هەڵبژاردنەکانی عێراق رایگەیاند دەستەی دادوەریی هەڵبژاردن سەرجەم تانەکانی لەبارەی هەڵبژاردنی پەرلەمانی کوردستانەوە رەتکردەوە.

جومانە غەلای وتەبێژی کۆمیسیۆن ئاماژەی بەوەکرد پێشتر 38 تانە لەبارەی هەڵبژاردنی پەرلەمانی کوردستان رەتکراوەتەوە و ئەمڕۆش سێ تانەکەی دیکە رەتکرایەوە.

رۆژی 16ـی11ـی 2024، وتەبێژی کۆمیسیۆنی باڵای سەربەخۆی هەڵبژاردنەکانی عێراق رایگەیاند، ئەنجامی 38 تانەی پێشکەشکراو لە دژی ئەنجامی هەڵبژاردنی خولی شەشەمی پەرلەمانی کوردستان، لەلایەن دەستەی دادوەریی هەڵبژاردنەکانەوە یەکلاییکراوەتەوە.

کۆمیسیۆنی باڵای هەڵبژاردنەکانی عێراق، بە دوو قۆناغ و لە رۆژانی 8 و 11ـی تشرینی دووەمی 2024، وەڵامی 41 تانەی پێشەشکراو لە ئەنجامی هەڵبژاردنی خولی شەشەمی پەرلەمانی کوردستان، رەوانەی دەستەی دادوەریی هەڵبژاردنەکان کرد.

دوای راگەیاندنی ئەنجامی رەسمی هەڵبژاردن، لایەنە سیاسییەکان و بەربژێرەکان 41 تانەیان لەسەر ئەنجامی هەڵبژاردنەکە پێشکەشکرد، 25ـیان لە سلێمانی، 12 تانە لە هەولێر، سێ تانە لە دهۆک و لە هەڵەبجەش تانەیەک پێشکەشکراوە.