بە بڕیارێک چەند دامەزراوەی کشتووکاڵی دەخرێنە ژێر دەسەڵاتی ئیدارەی کەرکوکەوە

کۆمەڵێک دامەزراوەی کشتووکاڵی خرانە ژێر دەسەڵاتی ئیدارەی کەرکوکەوە.
بەپێی بڕیارێکی ئەنجوومەنی وەزیران، دەسەڵاتی کۆمەڵێک دامەزراوەی کشتوکاڵی لەوەزارەتی کشتووکاڵەوە بۆ ژێر دەسەڵاتی ئیدارەی کەرکوک دەگوازرێنەوە.
بڕیارەکە لەدوایی کۆبوونەوەی ئەنجومەنی وەزیرانی عێراق بەپشت بەستن بە بڕیارێکی دادگەی فیدراڵی دراوە و هەموو پارێزگاکان دەگرێتەوە بە پارێزگای کەرکوکیشەوە.
ئەو دامەزراوانەی خرانە ژێر دەستی ئیدارەی پارێزگاکان بە کەرکوکیشەوە بریتین لە (بەڕێوەبەرایەتی کشتووکاڵ، هۆبەی وەبەرهێنانی کشتووکاڵی، وێستگەکانی دارستان و وشکانی، ناوەندو تاقیگەکانی سەروەتی ئاژەڵان و وێستگەو تاقیگەکانی فەرمانگە بەستەنە) پەیوەندی ئەم بەڕێوەبەرایەتیانەش بە وەزارەتی کشتووکاڵ هەڵوەشێندرانەوە.
بڕیاریشدرا وەزارەتی کشتووکاڵ بەفەرمانێکی وەزاری هەموو ئالیات و فەرمانبەر و بینای ئەو شوێنانە رادەستی حکومەتی خۆجێی پارێزگاکان بکات.
هەرچی کۆمپانیای گشتی "مابین نهرین" لەگەڵ کۆمپانیای گشتی ئامادەکردنی کەلوپەلە کشتووکاڵییەکان راستەوخۆ بە ناوەندەوە دەبەسترێنەوە.