ئارنى سلۆت چۆن شێوازى یاریکردنى لیفەرپولى گۆڕێ!

ئارنى سلۆت چۆن شێوازى یاریکردنى لیفەرپولى گۆڕێ!
ئاکۆ بیبانى
دوای ئەوەى یۆرگن کلۆبی ئەڵمانى و راهێنەرى یانەى لیفەرپول دوای نۆ ساڵ لە راهێنەرایەتیکردنى یانە ئینگلیزییەکە بڕیارى دا پشوو وەربگرێت و لە کارى راهێنەرایەتى دووربکەوێتەوە ، ترسێکى گەورە لاى هاندەرانى ریدز دروست بوو ، بەو پێیەى کلۆپ بەردى بناغەى لیفەرپولى نوێى دانایەوەو یانەکەى کرد بە یەکێک لە یانە گاریگەرەکانى ئەوروپا و ئینگلتەرا و شێوازى یاریکردنى یانەکەى گۆڕى و لەسەردەمى لاوازییەوە یانەکەى گەیاندەوە ترۆپک ، پرێمەرلیگى بەدەستهێناو  و لە 5  ساڵیشدا  سێ جار  یانەکەى گەیاندە یارى کۆتایی چامپیۆنزلیگ .
هەموو ئەمانە وایانکرد ترس و قەلەقییەک دروست بێت ، کلۆپ شێوازى یاریکردن و بیرۆکەو پلانى نوێى هەبوو ، هەموو ئەمانەش بە ئاشکرا بە سیماى یانەکەوە دەردەکەوت ، ئێستا  کە ئارنى سلۆتى هۆڵەندى بۆتە شوێنگرەوەى کلۆپ ، قەلەقی و دڵەڕاوکێکان ڕەوانەوە ! لیفەرپول نەک لاواز نەبووە بەڵکو بووە بە دێوزمەى ئینگلتەرا و ئەوروپا و ئێستا پێى دەوترێ فیتنەى ئەوروپا.
 ئارنى سلۆن جێ پەنجەى بەتەواوى بەسەر تیپەکەدا دیارە ، شێوازى یاریکردنى یاریزانانى یانەکەى گۆڕیوە ، بە پێچەوانەى کلۆبەوە کە حەزى بە کۆنترۆڵکردنى تۆپ و هێشتنەوەى لاى یاریزانەکانى نەبوو ، سلۆت ئەم شێوازە پەیرەو دەکات ،  تۆپ لاى یاریزانەکانى دەهێڵتەوەو یاریزانانى تیپى بەرامبەر ماندوو دەکات ، جگە لەوەش سلۆت متمانەى بەخشییوە بە  ڕایان گراڤێنبێرچی هۆڵەندى کە پێشتر دیلى کورسى یەدەک بوو کەمتر وەک یاریزانى سەرەکى دەرکەوتوە .
شێوازى یاریکردنى محەمەد سەڵاحى میسڕى لە زەمەنى هەردوو راهێنەردا گۆڕاوە ، پێشتر سەلاح تەنها گۆڵى دەکرد ، بەڵام ئێستا سەڵاح کاریگەرترە هەم گۆڵ دەکات هەم گۆڵیش دروستدەکات ، گەر سەرنج بدەینە هێڵى بەرگرى یانەى لیفەرپوول ئەوا هیچ یاریزانێکى نوی بۆ ئەو هێڵە دروست نەبووە بەڵام کاریگەرتربوون و بەهێزتردەردەکەون ، لە 13 یارى خولى ئینگلیزى تەنها 8 گۆڵیان لێکراوە ، لە 5 یارى چامپیۆنزلیگیش سەربارى ئەوەى بەرامبەر بە یانەکانى ( ریاڵ مەدرید و میلان و لیفەکوزن ) یارى کردوە کەچى تەنها یەک گۆڵى لێکراوە .
ئێستا یانە سورپۆشەکە دوای رۆشتنى کلۆپ هێشتا لەدەستێکى ئەمیندایە و پلەى یەکەمى پرێمەرلیگ و لوتکەى ریزبەندى چامپیۆنزلیگى گرتوە .