شێخ جەعفەر شێخ مستەفا لەگەڵ کونسولی گشتیی روسیا کۆدەبێتەوە

شێخ جەعفەر شێخ مستەفا، جێگری سەرۆکی هەرێمی کوردستان پێشوازی لە ماکسیم رۆبین، کونسولی گشتیی رووسیا لە هەرێمی کوردستان کرد.
لە کۆبوونەوەکەدا، پەیوەندییەکانی نێوان رووسیا و هەرێمی کوردستان، دوایین پێشهاتە سیاسییەکانی عێراق و ناوچەکە، پێکهێنانی کابینەی نوێی حکومەتی هەرێمی کوردستان، پەیوەندییەکانی نێوان هەولێر و بەغدا و چارەسەرکردنی کێشەکان لە چوارچێوەی دەستوور و چەند پرسێکی هاوبەش و جێی بایەخی نێوان هەردوولا، تاوتوێ کران.
لە کۆبوونەوەکەدا، هەردوولا جەختیان لە برەودان بە پەیوەندییەکانی نێوان ووڵاتی ڕووسیا لەگەڵ عێراق و هەرێمی کوردستان کردەوە، هەروەها یەکڕیزی نێوان لایەنە سیاسییەکانی هەرێمی کوردستانیان بە گرنگ زانی، لەپێناو خێرا پێکهێنان و دامەزراندنی حکومەتی نوێی هەرێمی کوردستان، کە لە ئاست بەرژەوەندییە باڵاکانی گەل و نیشتیماندا بێت، دواتر تیشک خرایە سەر دوایین پێشهات و گۆڕانکارییەکانی سوریا و کاریگەرییەکانی لەسەر ناوچەکە.