غەریب ئەحمەد: دژ بەبڕیارەی وەزارەتی تەندروستیی هەرێم لە دادگای فیدڕاڵی سکاڵامان دەبێت

وەزیری تەندروستی بێ گوێدانە رێكارە یاساییەكان و ئاگاداركردنەوەی بەڕێوەبەری گشتی لەوەزارەتی تەندروستی گرێبەست لەگەڵ كۆمپانیایەك ئیمزا دەكات.
د.رەهێڵ فەرەیدون بریكاری وەزارەتی تەندرووستی هەرێمی کوردستان راگەیاند: ئەو گرێبەستەی لەنێوان وەزارەتی تەندرووستی و كۆمپانیایەكدا بۆ دابینكردنی ئامێری تاقیگەی نەخۆشخانە حكومییەكان كراوە قۆرخكارییە، دەشڵێت بەهیچ شێوەیەك لەئەنجوومەنی وەزارەت رەزامەندی وەرنەگیراوە و ئاگاداریش نین.
بیرکارەکەی وەزارەتی تەندرووستی روونیشکردەوە پێشتر بۆ كڕینی دەرمانی شێرپەنجەش هاوشێوەی ئەم گرێبەستە كراوە و كڕینی ئەو دەرمانانە بۆ كۆمپانیایەك قۆرخكراوە.
باسیلەوەشکرد: بۆ خەڵکی ئەوە گرنگە نرخی پشكنین لە تاقیگە حكومییەكان كەمبكرێنەوە، بۆ حكومەتیش گونجاوی نرخ و کوالێتی ئامێرەكان گرنگن، ئەگەر ئەم دوو مەرجە رەچاو نەكرێت، كەواتە هۆكارێك لەپشت گرێبەستەكەوە هەیە".
هاوکات غەریب ئەحمەد، ئەندامی ئەنجومەنی نوێنەرانی عێراق رایگەیاند: لە ئەگەری دڵنیابوون لە پێدانی تاقیگە حكومییەکان بە کەرتی تایبەت بۆ ماوەی 10 ساڵ لەلایەن وەزارەتی تەندروستییەوە لە دادگای باڵای عێراق سکاڵامان دەبێت، چونکە ئەم بریارە زیانی بە كەرتی تەندرووستی دەگەێنێت.