ئاک پارتی: ئەم نەورۆزە پەکەکە چەک دادەنێت

غالیپ ئەنسەریئۆغڵو پەرلەمانتاری ئاک پارتی رایگەیاند، سوود لە هەڵەكانی رابردوو وەردەگیرێت بۆ دەستپێکردنەوەی پرسی ئاشتی و چاوەڕێ دەکرێت تاکو نەورۆز پەکەکە چەک دابنێت.
بەگوێرەی هەواڵی رۆژنامەی یەنی ئاسیای تورکیا، غالیب ئەنسەریئۆغلۆ رایگەیاندووە، پڕۆسەی دەستپێکردنەوەی دیدارەکان لە نێوان کورد و دەوڵەتی تورکیا بە وانە وەرگرتن لە هەڵەکانی پێشووتر هەنگاوی بۆ دەنرێت.
وتووشیەتی، ئیتر تورکیایەکی بێ شەڕ و سەقامگیر دەخوازین و چاوەڕێ دەکرێت تاکوو نەورۆزی ئەمساڵ پەکەکە چەکەکانی دابنێت.
هەواڵی بڵاوبوونەوەی چەک دانانی پەکەکە لە میدیای تورکیادا گەرمە و پێشتریش رۆژنامەیکی تورکی بڵاویکردەوە، پەکەکە لە مانگی شوباتی ئەمساڵدا چەک دادەنێت.
بڕیارە ئەمڕۆ شاندی دەم پارتی لەگەڵ گەورەترین پارتی ئۆپۆزسیۆنی تورکیا، جەهەپە، کۆببێتەوە و راوبۆچوونیان لەسەر دەستپێکردنەوەی پرۆسەی ئاشتی و دیدارەکەی ئیمڕاڵی بگۆڕنەوە.
پێشتریش ئەو شاندەی دەم پارتی سەردانی عەبدوڵا ئۆجەلانی کردبوو لەگەڵ دەوڵەت باخچەلی، سەرۆکی مەهەپە و هاوپەیمانی سەرەکی ئەردۆغان، کۆبوویەوە و گفتوگۆیان لەبارەی سەردانەکەیان بۆ لای عەبدوڵا ئۆجەلان کرد.