وەزارەتی پێشمەرگەی هەرێم فەرمانێکی وزاری بۆ هەموو
فەرماندە و ئەفسەر و پێشمەرگەکان دەرکرد و تێیدا هاتووە، هەموو جۆرە نمایش و خۆدەرخستنێک
لەناو بنکە و بارەگا سەربازییەکان بە جلوبەرگی سەربازییەوە قەدەغەیە.
لە فەرمانەکەی وەزارەتی پێشمەرگەدا هاتووە، لەپێناو
پاراستنی ئاسایشی سەربازیی هێزەکانی پێشمەرگە، ئاسایشی بنکە و بارەگای سەربازی، بۆ
راگرتنی ئەو دیاردە ناشارستانی و نادرووستەی لە تۆڕە کۆمەڵایەتییەکان دەبینرێن، ئەم
بڕیارانە دەرکراون.
بڕیارەکانیش بریتین لە، قەدەغەکردنی هەموو جۆرە پۆست
و بڵاوکردنەوەی هەرجۆرە نمایش و خۆدەرخستن و ریکڵامێک و بڵاوکردنەوەی هەموو شێوەیەکی
چالاکیی کەسی ئەفسەر و فەرماندە و پێشمەرگە بە جلوبەرگی سەربازی و لە بنکە و بارەگا
سەربازییەکاندا کە زیان بە شکۆ و کەسایەتییان بگەیەنێت.
هاوکات لە فەرمانە وزارییەکەیشدا هاتووە هەر
کەسێک لە تۆڕە کۆمەڵایەتییەکان ناوی کەسێک بزڕێنێت، بە پۆستکردن یاخود کۆمێنتی نەشیاو
و یان بڵاوکردنەوەی وێنە بێت، بە توندترین شێوە رووبەڕووی سزای یاسایی دەبێتەوە.
Copyright © 2020 Kirkuk Tv All Rights Reserved Designed And Developed By AVESTA GROUP