هەسەدە دەیان تانک و ئۆتۆمبێلی سەربازی سوپای تورکیای تێکشکاند

شەڕی هەسەدە و گروپە هاوپەیمانەکانی تورکیا لە بەنداوی تشرین تائێستا بەردەوامە، سوپای تورکیا بۆ پشتیوانی گروپە هاوپەیمانەکانی بەچڕی دەوروبەری بەنداوی تشرین بۆردومان دەکات، هەسەدەش رایگەیاند، دەیان تانک و ئۆتۆمبێلی سەربازی سوپای تورکیایان تێکشکاندوە.
هەسەدە رایگەیاند، لە بەرەبەیانی دوێنێوە، سوپای تورکیا بۆردومانی چڕی دەوروبەری بەنداوی تشرین دەکات، هاوکات لەگەڵ بەکارهێنانی فڕۆکەی بێفڕۆکەوانی تورکیا بۆردومانەکە تا درەنگانێکی شەو بەردەوام بوو.
ئاماژەی بەوەشکردوە، سوپای تورکیا و گروپە هاوپەیمانەکانی هێرشیان کردەسەر گوندی (خربەت ئەلزەمالە) و لەلایەن شەڕڤانانەوە ڕووبەڕویان بونەتەوە و لە ئەنجامدا هەشت چەکدار کوژراون و ژمارەیەکی دیکەش بریندار بوونە.
لە راگەیەنراوەکەدا هاتوە، لە هێرش و بۆردومانەکانی دوێنێدا، 29 کەس لە سوپای تورکیا و گروپە هاوپەیمانەکانی کوژراون و 15 کەسی دیکەشیان بریندار بون، هەروەها سێ تانک و سێ زرێپۆش لەناوبراون و کۆگایەکی تەقەمەنی تەقێندراوەتەوە و چوار ئۆتۆمبێلیش کە دوانیان دۆشکەیان هەڵگرتبو تێکشکێنران.