فڕۆکەیەکی نەفەرهەڵگرو هەلیکۆپتەرێک پێکیانداداو ژمارەیەک قوربانی لێکەوتەوە

فڕۆکەیەکى نەفەرهەڵگر و هێلیکۆپتەرێکى جۆرى بلاک هۆک لەنزیک واشنتۆنى ئەمەریکا پێکیاندادا و بە هەردوو فڕۆکەکە 67 سەرنشینیان هەڵگرتبو، تا ئێستاش ژمارەى قوربانییەکان بە رونى دیارنییە.
میدیاکانى ئەمەریکا لەبارەى روداوەکەوە دەڵێن: فڕۆکەکە تایبەت بوە بە کۆمپانیاى هێڵى ئاسمانى PSA و هەوڵى نیشتنەوەیداوە لە فڕۆکەخانەى رێگن، بەڵام لەگەڵ هێلیکۆپتەرێکى جۆرى بلاک هۆک پێکیانداداوە و کەوتونەتە ناو روبارى پەتۆمەکەوە.
بەپێی زانیارییە سەرەتاییەکان فڕۆکە نەفەرهەڵگرەکە 60 سەرنشین و 4 تیمى فڕۆکەوانى تێدا بوە، هێلیکۆپتەرەکەش سێ سەربازى تێدا بوە و تا ئێستا تەرمى 18 کەس دەرهێنراوەتەوە و چاوەڕێش دەکرێت ژمارەى قوربانییەکان زیاتر ببێت.
لەئیستادا فڕۆکەخانەى رێگن تەواوى گەشتەکانى راگرتوە و تیمەکانى فریاکەوتن سەرقاڵى روداوەکەن.
لەوبارەیەوە، دۆناڵد ترەمپ، سەرۆکى ئەمەریکا لە بڵاوکراوەیەکدا دەڵێت: لەو روداوە ترسناکە ئاگادارکراوەتەوە و ئەویش چاودێرى دۆخەکە دەکات و دواتر وردەکارییەکان دەخاتەڕو.