دادگای فیدڕاڵی هەڵوەشانەوەی دوو وەزارەتی له‌ حكومه‌تی هه‌رێم ره‌تكرده‌وه‌

ئەمڕۆ 11ی 2ی 2025 دادگای فیدڕاڵی بۆ 13 دۆسیە کۆبوەوە کە چوار لە دۆسییەکان پەیوەندییان بە هەرێمی کوردستانەوە هەبوو، لەگەڵ ئەوەی ئەو سکاڵایەی تۆمار کرابوو لەبارەی هاوسەرگیریی دووەم دواخست، هاوکات هەڵوەشانەوەی وەزارەتەکانی شەهیدان و ئەنفالکراوان، ئەوقاف، رەتکردەوە.

بەپێی راگەیەندراوێکی دادگای فیدراڵی، ئەمڕۆ دادگاکە بۆ 13 سکاڵا کۆبوەتەوە، کە پرسی هەڵوەشاندنەوەی وەزارەتی شەهیدان و ئەنفالکراوان و وەزارەتی ئەوقاف بۆ دەستە یان دامەزراوە لەخۆگرتبوو، لەکۆبونەوەکەدا بڕیاردرا بە رەتکردنەوەی هەردوو سکاڵا کە ئاڕاستەی دادگاکە کرابوو، بەمەبەستی هەڵوەشاندنەوەی هەردوو وەزارەتی شەهیدان و ئەنفالکراوان، ئەوقاف.

لەگەڵ ئەوەشدا دادگای فیدراڵی بڕیاریدا بە دواخستنی ئەو سکاڵایه‌ی کە ئاڕاستەیان کرابوو سەبارەت بە هاوسەرگیریی دووەم لە هەرێمی کوردستان ، بۆ رۆژی 25-3-2025، هەروەها بڕیاری دا بە رەتکردنەوەی هەردوو سکاڵا کە پەیوەندییان بە بڕیاری سزای سەرپێچی هاتووچۆ و زیادکردن و کەمکردنی سزاکە، چونکە بڕیارەکە پێچەوانەی دەستوور نییەو سکاڵاکە لەسەر هیچ کەسێک تۆمار نەکراوە.

سەبارەت بە هەڵوەشاندنەوەی وەزارەتی شەهیدان و ئەنفالکراوانی حکومەتی هەرێم و لابردنی وشەی ئەنفال لە وەزارەتەکە، سروە  محەمەد ئەندامی ئەنجومەنی نوێنەرانی عیراق لە فراکسیۆنی یەکێتیی رایگەیاندووه‌: "ئێمە وەک فراکسیۆنی یەکێتیی نیشتیمانیی کوردستان لە ئەنجومەنی نوێنەرانی عیراق ، ماوەی دوو هەفتەبوو لەسەر هێڵ بووین بۆ چارەسەرکردنی کێشەکە، هاوکات سەرۆکی فراکسیۆنمان سەردانی دادگای فیدڕاڵی کردووە و روونکردنەوەی پێویستی بە دادوەرەکان لەسەر ئەو پرسە داوە".

" لە دادگای باڵای تاوانەکانی عیراق، ئەنفالی خەڵکی کوردستان بە جینۆساید ناسراوە، بۆیە بەردەوام داکۆکیمان لەمانەوەی وشەی ئەنفال بە وەزارەتی شەهیدانەوە کردووە"، سروە محەمەد وادەڵێت.

ئەمەش لەکاتێکدایە لەدانیشتنەکەی ئەمڕۆیدا دادگای فیدراڵی چەند سکاڵایەکی دیکەی رەتکردۆتەوە، کە گرنگترینیان پرسی هەڵوەشانەوەی پۆستە حکومییەکان بووە بە وەکالەت لە عیراق.