ئەمریکا شوێنی حوسییەکان لە پارێزگای حودەیدە دەکاتە ئامانج

هێرشەکانی ئەمریکا بۆ سه‌ر حوسییەکانی یه‌مه‌ن به‌رده‌وامی هه‌یه‌و به‌گوێره‌ی وته‌ی به‌رپرسێكی حوسییەکان، شه‌وی ڕابردو له‌ پارێزگای حودەیدە سێ کەس کوژراون و دو کەسیش برینداربون.

ئەنیس ئەلسبحی وتەبێژی وەزارەتی تەندروستی لە حکومەتی حوسییەکان ڕایگەیاند، "به‌هۆی هێرشەکانی ئەمریکاوه‌ کە چەندین بینای کۆمپانیای ئاوی لە قەزای مەنسورییە لە پارێزگای حودەیدە کردووەتە ئامانج، سێ کەس کوژراون  و دووی دیکەش برینداربوونە  کە کارمەندی کۆمپانیاکە بوون".

ئەو لێدوانە ماوەیەکی کەم دوای ئەوە هات کە میدیاکانی حوسییەکان ڕایانگەیاند، کە هەڵمەتەکانی ئەمریکا شەوی سێشەممە چەند شوێنێکی ژێر دەسەڵاتی یاخیبوانی سەر بە ئێرانیان کردە ئامانج، لەوانە بەتایبەت ژێرخانی ئاوی پارێزگای حودەیدە.

بەگوێرەی هەمان سەرچاوە، سێ هەڵمەتیش پارێزگاری حەجا (باکوری ڕۆژئاوا)یان کردە ئامانج، سێ هەڵمەتی دیکەش قەڵای حوسییەکانیان لە پارێزگای سەعدە لە باکوری وڵات کردە ئامانج.

لە 15ی ئاداردا واشنتن ئۆپەراسیۆنێکی سەربازیی دژی حوسییەکان ڕاگەیاند بۆ ڕاگرتنی هێرشەکانیان بۆ سەر کەشتیەکان لە دەریای سور و کەنداوی عەدەن کە ڕێڕەوی دەریایی گرنگە بۆ بازرگانی جیهانی، واشنتن لە ڕاپۆرتێکدا کوژرانی ژمارەیەک بەرپرسی باڵای حوسییەکانی راگەیاندووە،لەوکاتەشەوە حوسییەکان بە بەردەوامی ڕایانگەیاندوە کە ناوچەکانی ژێر دەسەڵاتی ئەوان ڕوبەڕوی هێرشی ئەمریکا بوەتەوە.