عیراق كەمپی هۆڵ بە مەترسی ناو دەبات

ڕاوێژكاری ئاسایشی نیشتمانی عێراق رایگەیاند، عێراق تائێستا 12 هەزار هاوڵاتی لە كەمپی هۆڵەوە گەڕاندووەتەوە و داوا دەكات، كەمپی هۆڵ چۆڵبكرێت بۆئەوەی مترسیی تیرۆر نەمێنێت.

قاسم ئەعرەجی، ڕاوێژكاری ئاسایشی نیشتمانی عێراق لە وتارێكدا لە میانی سێهەمین كۆنفرانسی ڕۆژی جیهانیی ڕێگریكردن لە توندڕەوی ‌و توندو تیژی وتی: عێراق هەوڵیداوە، لە ڕێگەی هەنگاوی دیراسەتكراوەوە، كۆتایی بە هۆكارە ناوخۆییەكانی توندڕەوی و بەدیهێنانی دادپەروەری بە بەشداریی هەمووان بهێنرێت، لەڕێگەی هەڵبژاردنی دیموكراسی و حكومەتێكی مەدەنییەوە، دوور لەهەر فشارێكی ئایینی، تائیفی یان نیشتمانی بۆ چالاككردنی پرەنسیپی هاوڵاتیبوون لەڕێگەی هاوكاریی عێراق لەگەڵ نەتەوە یەكگرتووەكان و ڕێكخراوە نێودەوڵەتییەكان و وڵاتانی دۆست.

ئەعرەجی وتیشی: تا ئێستا دوانزە هەزار هاوڵاتی عێراقی لە كەمپی هۆڵەوە گواستراونەتەوە، كە لە مانگی پێنجی ساڵی ٢٠٢١ دەستمان پێكردووە، تا ئێستاش نزیكەی ١٦ هەزار هاوڵاتی عێراقیی ماون لە كەمپەكەدا.

ڕوونیكردەوە، حكومەتی عێراق بڕیاریداوە هەموو عێراقییەكان بگوازێتەوە بۆ ناوخۆی وڵات و بیانخاتە نێو بەرنامەكانی چاكسازیی دەروونی و كۆمەڵایەتییەوە.