ئەمڕۆ 16ی 2ی 2025 د. لەتیف جەمال رەشید سەرۆككۆماری عیراق، هەمواری یەکەمی یاسای بوودجەی عێراقی فیدڕاڵی ئیمزا کرد کە تایبەتە بە هەناردە کردنەوەی نەوتی هەرێمی کوردستان.
ئامانج رەحیم سکرتێری ئەنجومەنی وەزیرانی هەرێمی کوردستان، لە پۆستێکیدا کە لە تۆڕی کۆمەڵایەتی فەیسبووک بڵاویکردۆتەوە رایگەیاند: "سەرۆککۆماری عیراق ئیمزای لەسەر دەرچواندنی یاسای هەمواری یەکەمی یاسای بوودجەی عێراقی فیدڕاڵ ژمارە ١٣ ساڵی ٢٠٢٣ کرد".
"پرۆژە یاساکە تایبەتە بە هەناردەکردنەوەی نەوتی هەرێمی کوردستان لە ڕێگای کۆمپانیای سۆمۆ و رادەستکردنی داهاتی فرۆشتنی نەوتی هەناردەکراوی هەرێم لە خەزێنەی گشتی فیدڕاڵیی ئەویش بە گوێرەی ڕێکارەکانی هاتوو لە بڕگەکانی هەموارەکە تایبەت بە تێچووی بەرهەمهێنان و گواستنەوەی نەوتەکە." ئامانج رەحیم وادەڵێت.
بەگوێرەی ماددەی دووەمی هەمواری یاساکە، بۆ کەوتنە بواری جێبەجێکردنی یاساکە هێشتا قۆناغی بڵاوکردنەوەی یاساکە لە ڕۆژنامەی فەرمی ووەقایعی عێراقی ماوە.
ئیمزاکردنی هەمواری بودجە لەلایەن سەرۆککۆمارەوە دوای ئەوە دێت کە ئەنجومەنی نوێنەرانی عیراق لە 2ی شوباتی 2025 هەمواری یەکەمی یاسای بودجەی پەسەند کرد.
Copyright © 2020 Kirkuk Tv All Rights Reserved Designed And Developed By AVESTA GROUP