ئەمریکا سزای نوێی بەسەر کەرتی نەوتی ئێراندا سەپاند

وەزارەتی گەنجینەی ئەمریکا سەپاندنی سزای نوێی بەسەر 30 کۆمپانیای نەوتیی و کەشتییە نەوتییەکانی ئێراندا سەپاند، بە تایبەت ئەوانەی بە کەشتیی سێبەر ناسراون و بەشێوەی ناڕاستەوخۆ نەوتی ئێران هەناردە دەکەن.
بەگوێرەی راگەیەندراوی وەزارەتی گەنجینەی ئەمریکا، ئەوانەی سزاکان دەیانگرێتەوە بریتین لە، نێوەندگیرەکانی بەبازاڕکردنی نەوت لە ئیمارات و چین، لەگەڵ کۆمپانیاکانی گواستنەوەی نەوت بە تانکەر لە چین و هیندستان، هەروەها سەرۆکی کۆمپانیای نیشتمانیی نەوتی ئێران و کۆمپانیای تێرمیناڵی نەوتی ئێران.
سکۆت بێسنت، وەزیری گەنجینەی ئەمریکا رایگەیاندووە، ئێران لە پشتبەستن بە تۆڕێکی کەشتیی سێبەر و دەڵاڵی نەوت بەردەوامە تاوەکو بە ئاسانی نەوتەکەی بەبازاڕ بکات بۆ دابینکردنی داهات بۆ چالاکییەکانی.
وتیشی، هەرکەسێک مامەڵە بە نەوتی ئێرانەوە بکات خۆی دەخاتە بەردەم مەترسیی سزاکانی ئێمەوە.
ئەم راگەیاندنە لە کاتێکدایە، دۆناڵد ترەمپ، سەرۆکی ئەمریکا هەوڵدەدات هەناردەی نەوتی خاوی ئێران بۆ کەمترین ئاست دابەزێنێت و سەرچاوە داراییەکانی وشک بکات، تاوەکوو ئێران دەستی نەگاتە چەکی ئەتۆمی.