د. نەرمین مەعروف ئەندامی لیژنەی دارایی ئەنجومەنی نوینەرانی عیراق لەفراكسیۆنی یەكێتی راگەیاند: "بەنووسراوی رەسمی داوام سەرۆكوەزیرانی عیراق كرد كەبڕیاری خەرجكردنی 100 هەزار دینار بەناوی باشتركردنی بژێوییەوە، كەساڵی 2023 بۆ خانەنشینانی عیراق دەركرا، خانەنشینانی هەرێمیش بگرێتەوە.
وتیشی: لەكاتێكدا حكومەتی هەرێم لەمانگی 7ی ساڵی 2024 ەوە ئەو بڕە پارەیەی بۆ خانەنشینانی هەرێم خەرجكرد، بەڵام دواتر لەمانگی 1ی ئەمساڵەوە، بڕیاری خەرجكردنی 100 هەزار دینار بەناوی باشتركردنی بژێویی بۆ خانەنشینان راگرت، چونكە ئەو بڕیارە تەنها بۆ خانەنشینانی عیراق دەركراوە نەك خانەنشینانی هەرێم.
راشیگەیاند: "لەئێستادا چاوەڕوانی رەزامەندی سەرۆكوەزیران و وەزارەتی دارایی عیراقین بۆ دووبارە خەرجكردنەوەی ئەو بڕە پارەیە بۆ خانەنشینانی هەرێم، هاوكات پێمانوایە جێبەجێكردنی تەواوی یاساكە چەند مانگێكی پێبچێت.
بەپێی دەقی یاسای ئەو بڕیارەی كە ساڵی 2023 بۆ خانەنشینانی عیراق دەركرا، بڕی ئەو پارەیەی بەناوی باشتركردنی بژێوییەوە بۆ خانەنشینان خەرجدەكرێت لەخانەنشینێكەوە بۆ خانەنشینێكی دیكە جیاوازەو بەگوێرەی بڕوانامەو ساڵانی خزمەت و وارسی شەهیدان و چەند تایبەتمەندییەكی دیكە دەگۆڕێت.
Copyright © 2020 Kirkuk Tv All Rights Reserved Designed And Developed By AVESTA GROUP