هاتوچۆی عیراق ژمارەیەک رێنمایی نوێی بۆ شۆفێرانی ماتۆڕسکیل بڵاوکردەوە

هاتوچۆی عێراق چەند رێنماییەکی تایبەتی بۆ شۆفێرانی ماتۆڕسکیل دەرکرد و لە سەرەتای مانگی داهاتووەوە جێبەجێ دەکرێن.
بەڕێوەبەرایەتیی گشتیی هاتوچۆی عێراق، ژمارەیەک رێنمایی نوێی بۆ شۆفێرانی ماتۆڕسکیل دەرکردووە، بەگوێرەی رێنماییەکان نابێت هیچ کەسێک بەبێ کڵاوى تایبەت، ماتۆڕسکیل لێبخوڕێت و دەبێت هەر ماتۆڕسکیلێکیش تەنیا یەک کەسی لەسەر بێت.
هەر بەگوێرەی رێنماییەکان، لە سەعات یەکی نیوەشەوەوە تا 5ـی بەرەبەیان، هاتوچۆی ماتۆڕسکیل قەدە‌غە دەبێت.
هاتوچۆی عیراق جەختی لەوەشکردووەتەوە، لەگەڵ جێبەجێکردنی رێنماییەکاندا، نابێت هیچ کەسێک بەبێ مۆڵەتی شۆفێریی ماتۆڕسکیل لێبخوڕێت، بەپێچەوانەوە رێکاری یاسایی بەرامبەر دەگیرێتەبەر.
لە رێنماییە نوێیەکەدا هاتووە، هەر کەسێک ماتۆڕسکیلی بێ ژمارە لێبخوڕێت بە بڕی 200 هەزار دینار سزادەدرێت و ماتۆڕسکیلەکەشی دەستبەسەردەکرێت تاوەکو ژمارە وەردەگرێت.